Futbol

Diadomingo di famia den e clasico di e gigantenan RCA y Dakota

ORANJESTAD – Sigur un tremendo iniciativa tuma pa e tricolornan di Solito, RCA y e abehanan di Dakota despues cu diadomingo ultimo ambos ekipo a cuminsa un bataya di gigante entre e mas grandinan di nos futbol local. For di merdia te cu den oranan di anochi e dos organisacionnan a midi forsa den e diferente categorianan y bou animacion di un publico grandisimo.

No obstante di e rivalidad fuerte entre ambos ekipo, riba e diadomingo aki e ganamento no tabata primordial, sino engrandece e hermandad entre ambos organisacion. Mas cu claro a bay bek den tempo unda un y tur tabata corda e momentonan glorioso entre kizas e dos ekiponan mas grandi den historia di Aruba su futbol. Prome cu a clausura e bunita anochi tanto RCA y Dakota a honra algun baluarte cu sea a traha cu alma y cuerpo pa e organisacion y/of a defende e colornan di nan uniform dignamente. Ta asina cu SV Dakota a reconoce legendario boluntarionan miho bisa baluartenan Dakotero mientras cu SV RCA a reconoce e prome team campeon pais Aruba 1986.

Na final ambos organisacion a haci entrega di un check na Stichting Imeldahof esaki como muestra di aprecio pa nos comunidad. Tanto RCA como Dakota kier a gradici FFD, Minister Schwengle, Elite, DJ MCK, y cada referee cu a contribui como boluntario e dia aki. Manera hopi a comenta; ”bale la pena un ripiticion”.

To Top