Chess

Aruba ta Marca Historia den Ajedrez

ORANJESTAD – Aruba a caba di marca historia den e deporte Rey di e deportenan mental, y alabes e di dos deporte mundialmente mas practica despues di futbol, esta ajedrez (schaken), titulando Sub-Campeon di e di 5 edicion di e CARIFTA Chess Championship cu a tuma lugar di 24 pa 29 di Maart na St. Croix, US Virgin Islands.

Un total di 48 hungador di 7 pais (Aruba, Bahamas, Barbados, Jamaica, Suriname, US Virgin Islands y Trinidad & Tabogo) a participa den e Seccionnan Oficial di U-20 Absoluto y Femenino, U-16 Absoluto y Femino, y U-12 Absoluto y Femenino. Banda di esaki, tambe tabatin e categoriana inoficial di U-18 Absoluto y Femenino, U-14 Absoluto y Femenino, U-10 Absoluto y Femenino, y U-8 Absoluto y Femenino.

Cinco di e shete hungadornan di e Seleccion Hubenil di Aruba logra di gana premionan individual. Thamara Sagastegui a gana e medaya di oro den U-10 Femenino, medaya di plata den U-10 Absoluto y di 3 lugar di U-12 Femenino (trofeo y medaya di brons). Ethan Croeze a gana di 3 lugar di U-12 Absoluto (trofeo y medaya di brons), mescos cu Brian Diaz a gana di 3 lugar den U-16 Absoluto (trofeo y medaya di brons). Mark Bueno a gana medaya di plata den U-18 Absoluto, mientras cu Woman Candidate Master Annelaine Jacobs a bira Campeon di U-20 Femenino (trofeo y medaya di oro).

Como pais, basa riba un sistema di puntuacion, pa prome biaha den historia Aruba a logra di termina den e prome 3 lugarnan di un torneo regional ganando e di dos lugar (trofeo) di e CARIFTA Chess Championship 2016 cu den mundo di ajedrez ta ser considera e torneo regional hubenil di Caribe.

Federacion di Ajedrez Aruba ta sumamante contento y orguyoso pa e logronan di su seleccion hubenil. Un pabien grandi ta bay pa ful Team Aruba, e mayornan, entrenadornan, directiva y pa Aruba en general. Alabes un biaha mas kier a gradici tur esnan cu a sostene e biahe aki financieramente: Comision di Subisidio, ACE Firm, directiva di FAA y e mayornan. PABIEN ARUBA!

Most Popular

To Top