Futbol

Dakota a gana Nacional cu score di 5-2

ORANJESTAD: Diasabra nochi den e Compleho Deportivo Guillermo Prospero Trinidad na Dakota, e ekipo di SV Dakota tabatin un encuentro importante contra SV Nacional. Cu e victoria aki SV Dakota a clasifica automaticamente pa e play-off den semi-final. Sigur ya caba den e prome minuutnan di wega por bisa cu SV Dakota a domina e wega y ya caba na di 30 minuut di e prome tempo tabata dilanti cu e score di 4-0. Prome cu a pasa pa camerin, ex Minister di Salud y Deporte, Dr. Richard Visser hunto cu mr. Glenn Thode (Rector di Universidad di Aruba) a “Hype-Up” e hungadonan di SV Dakota cu algun palabra di motivacion cu sigur a duna un resultado hopi positivo.

Presidente di SV Dakota Harvey Clement a entrega un plakkaat den nomber di henter e organisacion na e hungado Damien Boers y gradiciendo e pa e aña cu e la milita den e ekipo, Boers lo ta saliendo pa Hulanda diasabra awor pa bay biba. Tambe Staf Tecnico encabesa pa Franklin Priest conhuntamente cu David Puriel a duna credito na tur hungado pa e dedicacion y sacrificio durante e prome y di dos buelta y sin laga afo e logro di diasabra anochi, tambe palabranan cu awor e trabou lo sigui cu mas intensidad pa cu play-off.

S.V. Dakota di aki ta cuminsa manda palabranan di invitacion na e bario di Dakota y Tarabana y na tur fiel fanaticonan di Dakota pa yega stadion y apoya e ekipo hoben aki cu ta haciendo un tremendo trabou.

E wega a termina cu e score di 5-2 na fabor di Dakota cu golnan anota pa Jesus Peñate, Owen van der Wijne, Nickenson Paul y Fercand Sophia.

 

Most Popular

To Top