Chess

Woman FIDE Master Maria Diaz a scirbi historia pa Aruba

BARBADOS – Siman pasa Federacion di Ajedrez Aruba (FAA) a manda 4 hungador pa participa n’e Sub Zonal 2.3.5 (ambos Absoluto y Femenino) na Bridgetwon, Barbados cu a ser organisa di 27 di April pa 3 di Mei. E Sub Zonal ta parti di e ciclo clasificatorio pa yega na Campeonato Mundial. Ta hunga prome den Sub Zonal, despues esnan cu a clasifica n’e prome tres lugarnan ta hunga den Zonal y pa ultimo di eynan esnan cu ta clasifica lo hunga e Campeonato Mundial.

Den e Sub Zonal Femenino pa Aruba a participa Woman FIDE Master (WFM) Maria Diaz, Woman Candidate Master (WCM) Annelaine Jacobs y Maria Paula de Mey.

Un total di 26 hungador di 9 pais (Aruba, Bahamas, Barbados, Guyana, Jamaica, Pto. Rico, Suriname, Venezuela, Trinidad & Tobago) a participa n’e Sub Zonal Femenino. WFM Maria Diaz, cu a haya un travel-grant di FIDE, ainda dos siman pasa a termina na di 3 lugar den e Campeonato Nacional di Aruba y a logra di mantene su nivel durante e Sub Zonal.

Practicamente henter e torneo e tabata na di dos lugar. El a termina cu 6,5 punto di 9 wega, producto di 6 gana, un empata y dos perdi. Banda di a sali Sub-Campeon, el a gana un suma di placa y a haya un norma di Maestro Internacional (MI). Lo mas importante ta cu WFM Maria Diaz ta clasifica pa e Zonal di e continente Americano y asina pa prome biaha un hungador di Aruba ta clasifica pa e Zonal aki.

WCM Annelaine Jacobs a cuminsa e torneo hopi bon, sacando 3 di 4, pero den e di dos mita dje torneo no a logra di score mesun bon y ta termina cu 4 punto di 9 wega (4 gana y 5 perdi) na di 17 lugar.

Maria Paula de Mey, contrario na WCM Annelaine, a cuminsa e torneo malo cu 0,5 punto di 4 wega, pero den di dos mita dje Sub Zonal ta logra gana 4 di su ultimo 5 weganan y ta termina cu 4,5 punto di 9 wega na di 14 lugar. Importante ta cu Maria Paula cu e resultado aki a haya su certificado di Woman Candidate Master!

Den e Sub Zonal Absoluto nos Maestro Nacional Mark Bueno a participa pa Aruba. Un total di 44 hungador di 11 pais (Aruba, Bahamas, Barbados, Corsou, Jamaica, Guyana, Pto. Rico, Republica Dominicana, Suriname, Venezuela, Trinidad & Tobago) a participa n’e Sub Zonal Absoluto. Mark a bataya bon, aunke el a haya contrincantenan hopi fuerte, y el a logra di score en total 4,5 punto di 9 wega, terminando na di 28 lugar. Cu su score, e tambe ta haya certificado di Candidate Master!

Federacion di Ajedrez Aruba ta hopi orguyoso di e logro di Team Aruba na Barbados y kier a gradici esnan cu a haci e biahe aki financieramente posibel: Comision di Subsidio, FIDE, Directiva di FAA y mayornan. Aruba pabien!

Most Popular

To Top