Taekwondo

Taekwondista Arubano Monica Pimentel na Sur Korea

SUR KOREA – Dia 10 di Maart 2016 lo keda un fecha historico pa e deporte di Taekwondo na Aruba. Monica Pimentel taekwondista femenina di e seleccion nacional di Aruba ta clasifica pa prome biaha den historia di Aruba pa Weganan Olimpico. Na Augustus Monica Pimentel lo tin cu viaha pa Rio de Janeiro pa competi na nivel mas halto di e deporte y esaki ta rekeri un preparacion na nivel di mundial.

Despues di a gana su pase na Aguadulces, Mexico Monica a regresa Aruba pa solamente un siman y a sigui di biaha pa viaha otro banda di mundo pa sigui cu su preparacion na Sur Korea.

Monica Pimentel a conta nos un tiki di su trayectoria den taekwondo, unda cu e la cuminsa cu Grand Master Chaco Cornelio na Noord Taekwondo Center y ta drenta seleccion den e temporada cu seleccion nacional tawata dirigi pa Jorge Ramos di Argentina. Manera hopi hoben na Aruba Monica Pimentel a bai Hulanda sigui studia y aki ta bin bira 2 biaha campeon Hulandes na unda e tawata train bou guia di Mirjam Munskens na Nijmegen.

E trayectoria pa un atleta no ta facil y pa Monica e lessionan a hunga nan rol, 4 biaha a sa di kibra su man y despues di 2 operacion na unda a kibra dede y pols ta sembra un desmotivacion serca su persona.

Phillipe Pinerd actual coach di Monica Pimentel ta bira e persona cu a inspire pa no entrega. Y ta na aña 2011 den preparacion pa University Games na Shengzen, China Monica ta hanja e opportunidad pa asisti na training camp na Sur Korea danki na invitacion di Moon Dae Sung unda actualmente Monica Pimentel ta entrenando.

Monica su training ta encera mainta di hopi training fisico sigui pa atardi cu training di taekwondo hunto cu e universidad di Keimyung y anochi training ta termina cu training personal pa baha peso y mantene.

Por ultimo, Monica Pimentel tin tres berdad di bida cu e la comparti cu nos, uno e ta confia den e plan di Dios, di dos Monica no tin miedo y por ultimo Monica ta purba di ta un bon persona tur dia. Nos di Sports Zone Aruba ta desea Monica Pimentel tur clase di exito cu su preparacion pa Rio 2016.

Most Popular

To Top