Baseball

Xander Bogaerts: Ni den wega di Playstation!

BOSTON – Den su carera profesional hopi jong, e critica semper tawata “si pero ja…”
Y mayoria biaha e tawata algo asina aki: “Si, Bogaerts por bati pa averahe, pero number 3 den lineup, e no mester bati mas homerun?”

Ayeranochi, tawata otro storia, e critica constructivo a wordo poni den silencio ora Bogaerts den di prome inning ta dal un homerun pa dos careda pa asina Boston Red Sox bolbe pone un offensiva impressionante pa gana Houston Astros cu score di 11-1 na Fenway Park.

Pa Bogaerts, e tawata su di 3 homerun di temporada y solamente di 10 incluyendo batasonan di anja pasa, pero e mes a keda sorprendi con e la tuma lugar.

“Mi no tawata buscando un homerun,” esey e la bisa di su prome homerun den di prome inning. “Esey tawata e ultimo cos cu mi tawata expect e momento ey. Mi a pone e bat riba e bala y e la bai.”

E mesun manera non chalant cu Bogaerts a splike e la pasa. Un curva di pitcher di Houston Astros Dallas Keuchel a keda abou y aden den e zona, pero Bogaerts a keda riba dje y pase riba e Green Monster na Fenway Park.

Bogaerts su homerun a pone e tono pa e resto di wega y ta marca e prome biaha den historia cu Boston Red Sox a score 8 careda of mas cu 12 of mas hit den 6 wega sigui.

“Bogey a cuminsa e cos pa nos,” Red Sox manager John Farrel a splica. “E la bai abou y topa un bon curva di Keuchel, y unabes esey a pasa, nos tawata pone bon turno na bate durante henter e anochi.”

Y esey ta algo cu Bogaerts ta bin ta haci henter temporada, bon turno na bate. Ayera e tawata 5-2, cu un liderato di e ekipo cu un averahe di .331, poniendo e den e Top 5 di American League.

Por ultimo Bogaerts a bisa, “E ta manera hunga Playstation, bo sa? Mi ta kere ni ora di Playstation nos ta score asina hopi careda.” “Pero esey ta e realidad y nos ta haciendo e na cas, den nos parke y e fanaticonan ta goza.”

Most Popular

To Top