Futbol

Dakota ta soprende RCA y ta piki e prome 3 punto.

ORANJESTAD – Diasabra a duna inicio na e playoff final di e division di mas halto di Aruba su futbol. Stadion Guillermo Prospero Trinidad ta escenario principal, AVB di su banda e crea e ambiente desde di tempran dilanti stadion y tiki tiki e fanaticonan a jega stadion.

RCA, Britannia, Dakota y Nacional/Washington ta e cuater ekiponan cu a logra drenta e playoff final. RCA solido na prome lugar cu 51 punto, Britannia na di 2 lugar cu 47 punto, Dakota na di 3 lugar cu 42 punto y por ultimo Nacional/Washington a drenta den porta di cushina na ultimo ora cu 27 punto.

Prome partido a priminti di ta bon, RCA lider di campeonato y cu confiansa grandi a topa e ekipo di Dakota. Ambos  ekipo a sali hopi aggresivo. Dakota ta ricibi e prome chens tempran den di 20 minuut ora cu defensa di RCA ta comete un handsbal den area cu ta resulta den un carchi cora y penalty. Portero di RCA David “Pollo”Maestre ta salba RCA ora cu e ta pomp e bala di delantero di Dakota David Abdul.

RCA cu un homber menos ta sigui hunga su partido y ta pressiona na varios occasion pero ta na di 41 minuut por medio di un accion di Nickenson Paul cu un pase pa Ricky Hodge cu ta lora un bunita bala dilanti gol cu defensa di RCA Ale Aparicio ta mishi cune pa un autogol y asina Dakota ta bai ariba 1-0.

Ta na di 45 minuut RCA ta hanja oportunidad di empata e partido ora cu Steven Rua ta drenta area y ta wordo tumba pa defensa di Dakota Nickenson Paul pa penalty. Steven Rua mes ta recobra e penalty cu na prome instante ta resulta gol pero referee ta indica cu prome cu e tiro hungadornan a drenta area penal. Steven Rua ariba su di dos intento ta wordo nenga door di un tremendo salbada di Erick Abdul portero di Dakota pa mantene e wega 1-0 pa Dakota y asina drenta halftime.

Den di dos tempo Dakota ta keda bou di pression di RCA y ta mantene e partido 1-0 y asina ta bai cas cu un victoria importante den e playoff final. Dakota ta sorprende RCA y ta piki e prome 3 punto.

Mester bisa cu e fanaticonan di Dakota a bin engrandi pa apoya nan ekipo.

Most Popular

To Top