News

Cada hoben reconoci den e proyecto Hoben y Talentoso ta un fuente di inspiracion

ORANJESTAD – Recientemente e EXPO Hoben y Talentoso a yega Colegio Arubano pa asina nos alumnonan di dicho scol sera conoci cu e rolemodelnan cu den pasado a wordo reconoci den e bunita proyecto Hoben y Talentoso. Despues di a bishita Colegio San Nicolas, St Paulus School y Colegio Santa Filomena, awo Colegio Arubano a bira e di cuater scol cu ta ricibi e bunita EXPO Hoben y Talentoso. Den nomber di Colegio Arubano a hiba palabra docente y alabes vocero di e scol, juffrouw Zaida Everon.

“Masha tempo Colegio Arubano a spera riba e Expo Hoben y Talentoso, esaki cu man habri mirando cu tantisimo di e hobennan cu ta forma parti di e Award Book Hoben y Talentoso 2013, 2014 y 2015 ta sea alumnonan of ex-alumnonan di Colegio Arubano”, juffrouw Everon a bisa. E la agrega; “Como un di e scolnan di mas grandi na Aruba bishita pa alrededor di 1500 alumno, pa Colegio Arubano e ta un oportunidad unico pa expone tur e talentonan aki. Cada un talento lo ta un fuente di motivacion y inspiracion pa e alumnonan cu kizas ainda no a descubri kiko tur ta nan potencialnan. Pa medio di e Expo Hoben y Talentoso ta spera cu e inspiracionnan lo mishi e alumnonan di paden y ilumina nan mente pa asina nan por logra nan metanan poni”. Na final di e mainta algun di e hobennan reconoci den e proyecto Hoben y Talentoso a introduci nan mes na e alumno y docentenan presente y a duna un testimonio cortico pakiko nan a wordo reconoci den e bunita proyecto aki.

Desde su inicio na aña 2013 y bou inciativa di Minister President, Mike Eman, e proyecto Hoben y Talentoso a bira masha popular unda a reconoce un total di 104 hobennan local cu a destaca den diferente area sea na Aruba of den exterior, esaki den e areanan di inovacion, entrepreneurship, educacion, musica, arte, baile y deporte. Cada un di e hobennan reconoci mester bira un fuente di inspiracion pa otro hobennan y henter nos comunidad. Nan ta un berdadero ehempel y mas cu claro cada un di nan lo mester sigui traha duro pa logra metanan cu nan pone nan dilanti.

Pa un periodo di cuater siman, e Expo Hoben y Talentoso lo por ser admira den e Hal di Colegio Arubano na Playa y lo permanece na e scol te cu dia 12 di Juni.

IMG_2069 IMG_2112

Most Popular

To Top