News

Pronto COA lo inicia cu e curso Leadership & Management

ORANJESTAD – Recientemente e Direccion di Desaroyo di Comite Olimpico Arubano a duna dos anochi di informacion pa loke ta un curso nobo cu lo bay ofrece dentro di poco na nos federacionnan deportivo, miembro di COA. E curso cu ta forma parti di e plan di desaroyo di 2015 pa 2017 lo carga e titulo di “Leadership & Management and Board training”. E dos anochinan di informacion a tuma lugar den Aula A di Universidad di Aruba y tabata bou encargo di e director di Direccion di Desaroyo, sr. Robert Falconi.

E dos anochinan di informacion a wordo atendi pa un total 21 di e 23 federacionnan deportivo, un muestra cu tin hopi interes pa e curso aki. Den e periodo venidero, y pa medio di e curso aki, COA lo enfoca riba e tres areanan menciona. Prome cu e inicio lo haci un “assessment” unda cu tur federacion deportivo lo mester fiha nan posicion unda – segun nan – nan ta para awe na 2016, kiko ta nan puntonan fuerte y menos fuerte cu nan lo mester traha riba nan pa asina mustra a lo menos un mehoracion den esakinan. Lo bay traha riba e areanan di bon gobernacion, un bon administracion deportivo y bon recursonan humano.

E idea ta pa e directiva di cada federacion participante haya un “board excercise”, pa fiha nan puntonan y kiko pa cada un lo bira nan proyeccion pa e siguiente añanan. Tambe nan lo haya un “board skills training” cual lo ta bou encargo di sr. Roy Mezas, kende den pasado tabata presidente di COA. Na banda di esakinan un otro parti di e curso lo ta bou encargo di sr. Menno Vinck, kende lo enfoca mas riba e parti con pa guia un organisacion deportivo, esaki den e areanan di “Leadership and Management”. Aki lo duna diferente tarea con pa mehora nan mes pa lidera y maneha nan posicion den e federacion cu nan ta forma parti di dje.

Diasabra awo 21 di mei lo inicia cu e proyecto y lo tin un duracion di 6 luna largo. Intencion ta pa tur e federacionnan miembro di COA participa na e curso aki sigur cu e presidente y preferiblemente cu e directiva completo di cada federacion, pero tambe cu posibel prospectonan fuerte cu lo por asumi un encargo den futuro cercano, nan tambe por sigui e curso aki. Cu esaki e direccion di desaroyo di COA kier crea un “learning environment” bou di nos federacionnan deportivo y nan deporte, un consistencia den mehoracion di nivel den tur sentido di palabra. E proyecto aki lo dura te cu aña 2017 y te hasta 2018.

Most Popular

To Top