Baseball

No Hit, No Run, Perfect Game pitcha pa Devyan Dyal

SANTA CRUZ – Diasabra mainta cu hopi enthusiasmo a start sali cu e interliga pa e temporada di 2016 di Aruba Little League. E prome division cu a mira accion ta den e edad di Senior Division (15-16 anja) na unda e ekipo di North league a topa e combinacion di Center y South league (CAS). E dos ekipo nan aki lo bataya cinco wega si tin mester den un “Best Out Of Five” pa asina mira ken lo ricibi e derecho pa representa Aruba na e Latinoamericano na Guayama, Puerto Rico.

North league a start cu nan pitcher Milangelo Richardson mientras cu e ekipo di CAS a habri cu Danny Gomes, na unda e ekipo di North league ta gana cu score di 5-2.

Diadomingo merdia a tuma lugar e di dos partido di e serie na unda CAS tawata mester di un victoria y a sali cu nan pitcher estelar Devyan Dyal mientras cu North league a start cu Rivandrick Simon. Pa e prome 3 inning e partido aki a bira un duelo di pitcheo entre Dyal y Simon cu a sa di domina e bateo di ambos banda. Ta den di cabes di 4 por medio di un deadball Rashi Barry ta embasa y por medio di un wild pitch ta avansa pa segunda base. Miguel Thiel ta pone un bunita toke na unda e pitcher Simon ta tira malo pa primera pa asina e prome careda bin score. CAS ta anota 2 careda mas den e inning y asina ta habri e partido 3-0. CAS den e siguiente inning ta anota un total di 7 careda y asina ta knockout e ekipo di North 10-0. Devyan Dyal no ta entrega niun hit, no ta laga niun careda anota y asina ta carga su ekipo como e pitcher ganador tirando un perfect game empatando e serie na uno.

Fanaticonan di bon baseball ta keda cordialmente invita pa bin presencia na stadion Nadi Croes/Crismo Angela Ballpark na Santa Cruz y pa esnan cu no por jega Sports Zone Aruba den colaboracion cu iTV Canal 49 y Team Films lo trece e partido aki te den bo hogar cu narracion di Jairo Dirksen y commentarionan di Juancho Ridderstap.

Most Popular

To Top