Futbol

Playoff 2016: Promer dos fecha nan cu hopi emocion

ORANJESTAD – E promer dos fecha nan di nos Playoff semifinal di Divison Honor a sera cu varios resultado interesante y cu bastante emocion. Dakota despues di su victoria a la “Wild Wild West” riba Nacional Washington ta bira leader cu 6 punto, sigui pa RCA y Britannia cu 3 punto cada uno, y Nacional Washington ta na ultimo lugar sin punto. Un total di 12 gol a ser marca den e promer 4 wega nan cu ta un average di 3 gol pa wega, pues e fanatico nan sigur a hanja valor pa nan plaka.

E team cu sigur mas fanaticada ta halando pa stadion ta Dakota cu ki ora cu nan hunga e stadion ta geel cu preto. Nos tawata tin dos wega cu a ser dicidi den tempo extra cual tawata e victoria di Britannia riba Nacional Washington y despues RCA ta duna Britanna e mesun trato aki cu gol den extra tempo pa bai cas cu e 3 punto nan. Nos por a wak un par di tremendo gol tambe, esun di Luis Coco Estrada den pito contra Nacional Washington, E golazo di di Valdo Leocadia pa empata e wega contra Dakota, Ricky Hodge haciendo su cos y poniendo e bala den skina abou contra Nacional Washington pa duna Dakota ventaha 2-1 y sin lubida e tremendo cabezaso di Nathan Loe-a- Nioe cu a duna RCA un di dos bida contra Britannia.

20160514-201A6919

Faltando un fecha mas pa e promer buelta caba, cosnan ta cuminsa preta y e margin di error ta bira menos. Cada punta ta cuminsa pisa dobbel y e presion ta bira mas grandi. Ainda tur team tin chance matematicamente pa clasifica, pero mester hunga bala y mas importante mester score gol. Esey ta loke tin Dakota na cabez di e tabla, ya cu apesar cu nan no ta hungando e futbol cu tur hende kier mira, su delantero nan principal Ricky Hodge y Jesus Peñate a hanja caminda pa gol. E unico delantero di Dakota cu falta pa score ta Juel Balentien. Te ainda e ta manera un pronkstuk riba veld y no ta hanjando sufficiente bala. Pa Dakota logra yega final, e hungador aki Juel Balentien ta bai ta clave. Dakota mester cuminsa pusha mas bala pa Balentien, tanto den pia como den espacio pa e por traha y habri espacio pa tanto Hodge como Peñate por traha ya cu semper nan ta fuertemente marca. Otro hungador cu mester keda mas consistent ta Ezra Bosnie. Dakota ta draai segun Bosnie ta move. E ta e salida y e armador y ora e ta hungando bon, Dakota ta move y domina, pero manera cu e cuminsa baha intensidad, Dakota ta cai den e wega di pase largo, loke ta haci nan hopi predicible.

RCA di otro banda tin basta hungador cu carchi y pa e siguente partido nan lo ta sin Jeamir Howell Brokken. RCA su entrenador Veron Albertz no ta mucho contento cu e rendimento di su team. E tricolor nan ta hungando mucho ansha y ta purba pusha un tempo halto, pero ta haciendo hopi paso malo y tin hopi perdimento di bala innecesario, vooral den e ultimo tercera parti di veld tin hopi bruhamento. Pa e siguente wega e defense central Cristian Sinisterra lo ta bek, y asina Roman Aparicio por bolbe bek na su posicion di bolante central y lo por yuda organiza mas e medio campo. Ronald Gomez y Steven Rua mester cuminsa hunga un rol mas protagonista den e siguiente partidonan, esey si RCA kier yega final y retene nan titulo di campeon. Ambos hungador ainda mester score nan promer gol di playoff y ta bai ta importante pa nan pone bala den net.

20160514-201A7107E puma nan di Piedra Plat a pasa di sinti e climax di gloria pa e agonia di derota den e espacio di dos wega. Britannia kier a bai pa e knockout punch contra RCA,
pero ta paga caro e riesgo nan cu nan a tuma y ta cai venci den tempo extra. Un empate lo a laga RCA cu 1 punto den dos wega y lo a duna Britannia e segundo lugar cu 4 punto y cu un ventaha moral. Pero faltando apenas algun seconde pa wega caba, RCA ta score e gol di victoria y bolter tur cos cabez abou. Un empate lo tawata un sla duro na e moral tricolor, pero Britannia kier a bai pa mas y na final a keda cu sin saco y sin cangrew. Luis Coco Estrada mester mantene e nivel di e dos promer wega nan ja cu e ta e curazon di e team, Pheandrick Baromeo tambe ta disfrutando di un bon playoff, apesar di a crea hopi oportunidad di gol, e no tawata sa di score ainda. Baromeo mester cuminsa afina su punteria pa e por yuda Britannia yega final. Otro cu mester demostra mas ta Sebastian Montoya Cano. Britannia mester cuminsa explota Sebastian su velocidad mas y e bolantenan mester cuminsa dune mas bala.

Nacional Washington a sorprende tur hende y silencia tur critica cu nan no tawata merece di ta den playoff. Apesar di ta sin punto, e dragon nan ta hungando un bon futbol y en especial den e ultimo tercera parti di veld ta creando varios oportunidad di gol, pero no ta poniendo e bala den net. Tambe Silo Brete mester busca manera di sera e team na otro ja cu tin ora ta mustra cu e team ta parti den dos y ta laga hopi espacio pa otro team nan por ataka (vooral den medio campo). No ta pornada Nacional Washington tin 5 gol encontra den dos wega y ta un problema cu Nacional Washington mester soluciona rapido. Un derota mas lo ta pracitamemente e sentecia cu nan lo ta elimina.

Playoffs Divison Honor 2015 – 2016 ta continua diamars 24 di mei, Britannia contra Dakota y diaranson Nacional Washington ta midi forsa cu RCA. Tur wega ta tuma lugar den Compleho Deportivo Guillermo Prospero Trinidad y bala ta cuminsa lora pa 8or di anochi.

Nos di Sports Zone Aruba ta gradici tur persona cu ta bishita nos website, Facebook page y ta lesa nos articulo nan. Nos ta gradicido di tur e commentario nan cu nos ta ricibi y nos lo sigiu traha pa trese informacion di deporte den tur hogar na Aruba.

Most Popular

To Top