News

‘Ban Move Camp’ 2016 organisa pa IBiSA y ASU den luna di Juli

ORANJESTAD – Temporada di aña escolar ta yegando su final un biaha mas y ya caba Instituto Biba Saludabel y Activo, IBiSA hunto cu ASU tin su programa di vacacion cla pa ofrece na nos muchanan. Ta bon pa mayornan planea y regla for di trempan e vakantie di nan yiunan. ‘Ban Move Camp’ ta un actividad cu ta wordo organisa anualmente door di Ministerio di Deporte, IBiSA y ASU.

Esaki ta e ‘vakantie camp ’ cu ta wordo organisa den luna di juli y cada siman e concentracion ta na un localidad diferente. E aña aki e prome siman di e camp ta na Compleho Deportivo Frans Figaroa na Noord, e di dos siman ta sigui na Centro Deportivo Betico Croes na Sta. Cruz y e ultimo siman e ta tuma lugar na IBiSA Sport Centrum na San Nicolas.

Camp na Noord:
Inscripcion ta habri primeramente pa e prome siman di camp cu ta e localidad na Noord. Pa esaki por cuminsa inscribi for di dialuna awor dia 30 di mei 2016 te cu diabierna dia 10 di juni 2016. Esaki ta posibel for di 8’or di mainta te cu 12’or di merdia y for di 1’or di merdia te cu 4’or di atardi, SOLAMENTE na oficina principal di IBiSA situa na Frankrijkstraat 1. Durante dos siman ta duna oportunidad pa inscribi, pero IBiSA ta corda mayornan cu tin solamente 100 cupo disponibel den e camp. Na momento cu yega e cantidad di cupo, no ta tuma mas inscripcion. Alabes ta informa na mayornan, cu no ta tuma inscripcion mas riba e dia di camp mes. Pesey ta pidi mayornan pa acudi trempan y sigura e cupo di bo yiu. E ‘Ban Move Camp’ na Compleho Deportivo Frans Figaroa na Noord ta tuma lugar den e siman di 11 pa 15 di juli 2016.

Rekisito na momento di inscribi:
Un mayor of voogd di e mucha mester pasa personalmente pa inscribi y mester trece e carchi di AZV di e mucha pa por registra su number di AZV pa e wordo sigura. Na momento di inscripicon ta haci e pago tambe. E costo di participacion na e ‘vakantie camp’ ta Afl. 25,- pa 1 yiu. Pa 2 yiu esaki ta Afl. 40,-. Y pa 3 yiu e participacion ta bira Afl. 60,-. E costo di participacion ta pa mucha pa siman, y e ta encera cu e mucha ta ricibi un T-shirt y tambe 1 sandwich, 1 juice y 1 fruta pa dia.

Siman di ‘Ban Move camp’:
E orario di e ‘vakantie camp’ ta for di 8’or di mainta pa 1’or di merdia. Y ta pa muchanan di 6 pa 14 aña cu ta bayendo Scol Basico. Durante e camp, e muchanan ta haya un programa organisa y varia cu ta encera ‘Deporte y Movecion’ tur dia. Pa mas informacion por tuma contacto cu oficina di IBiSA.

Most Popular

To Top