Futbol

Arubaanse Voetbal Bond ta transparente?

Entregamento di protest ta parti di wega di futbol, e ta un derecho cu tur team tin y cu no por wordo nenga. Hopi rankamento di ciboyo tawata tin den pasado cu hasta mester a bai hues pa dicidi un ke otro den nos futbol local. Nacional Washington ta uno cu nunca a duda pa busca su derecho mas aya di AVB y a bai corte varios biaha. Futbol ta wordu para di hunga riba veld y e wega ta pasa e ora pa wordo hunga den corte dilanti mesa berde. Tawata tin un anja cu cos tawata asina bruha cu e playoff mester a wordo hunga cu 5 team envez di 4 team manera ta normal.

Ultimo anja nan cos no a bai asina leeuw pero casi tur anja tin un protest grandi, e por ta den porta di playoff of den playoff mes. E anja aki a cai un protest di Britannia contra Nacional Washington cual partido a tuma lugar riba mei 29 y a keda empata na un gol pa banda. Esaki tawata un wega cu Britannia tawata gana 1-0 te na di 90 minuut di wega y riba dje Nacional Washington a keda cu solamente 9 hungador riba tereno. E dragon nan ta score un gol den extra tempo y ta empata e wega y complica cos pa Britannia cu lo a keda cu 4 punto y haci e chance di classifica uno chiquito.

Britannia ta entrega un protest 24 ora despues bisando cu e hungador Valdo Leocadio tawata un hungador illegal riba tereno ya cu e hungador aki, esta Valdo Leocadia a hanja un carchi cora den e pen ultimo wega di campeonato regular contra RCA y cu e la sinta un wega so di castigo y no dos wega. E protesta ta wordu trata y Britannia ta hanja rason y ta gana e wega y e tres punto nan. Esaki a pone cu Britannia ta bai 6 punto net uno tras di RCA cu tawata tin 7 punto. Si Britannia mester a gana su wega contra RCA, cual nan tawata gana 1-0 te na di 90 minuut, nos ta kere cu e campeonato lo a dal para indefinidamente. Cu e Victoria ey Britannia lo a acumula 9 punto lagando RCA cu 7 y cu un wega mas pa bai, e puma nan lo tawata den bon posicion pa por a clasifica pa final. Pero RCA ta score 2 gol den extra tempo y ta gana 2-1 y ta laga Britannia na caminda. Si RCA a perde e wega ey, nan tambe por a uni na e protesta di Nacional Washington como “belang hebbende.”

Pero bolbiendo na e caso mes, net promer cu su siguiente wega contra Dakota, Nacional Washington ta apela e caso y ta manda esaki pa e wordu trata den beroepscommissie. Beroepscommissie ta e systema di appelashon cu AVB ta usa caminda team nan cu no ta di acuerdo cu e decision di AVB por entrega nan protesta. E beroepscommissie ta consisti di 7 experto legal cu tin cu toets y debati si e decision den promer instante di AVB ta correcto.

Nos tin entendi cu tin various abogado den e comission aki. Riba dje e apelashon aki tin un costo di Awg 400.00. E caso aki ta trece cu ne varios pregunta interesante. E promer ta con por ta possible cu e donjo di curpa mes cu ta Nacional Washington no sa cu su hungador mester sinta 2 wega, y e team di Britannia si ta na altura di tal informashon. No ta un secreto publico cu Britannia tin su informante(nan) den AVB y esaki NO ta e caso di awor pero ta algo di basta anja. Si bo wak e historia di protesta, di 10 protesta cu Britannia entrega nan ta gana 11. Hopi biaha riba punto nan y informashon confidencial cu ni e team contrario sa cu ta wordu protesta. Awor ta bin aserca cu e president y e vice president ta sali for di cuna di Britannia ta pone den duda e imparcialidad di e directiva actual.

Ta mustra manera cu a purba di usa e protesta pa sacrifica Nacional Washington ya cu e dragon nan ta pracitcamente elimina y cu nan no tin mucho mas di gana den e playoff aki y no lo bai gasta Awg 400.00 pa bai beroep. Directiva di Nacional Washington a dicidi cu apesar cu nan no tin ningun chance mas den playoff, nan no ta bai laga e asunto aki bai sin mas y nan ta apela, ya cu e precedente cu e caso aki ta crea ta cu directiva por haci y deshaci cu decision nan di refree sin mester di duna cuenta ni sigui procedura.

E bala ta den scochi di Beroepscommissie awor. E comishon di apelashon lo trata e caso interesante aki diamars juni 14, 2016 y lo ta interesante pa sa kiko e veredicto di esaki lo ta. Cuanto pujito mas lo sali di e makutu aki?

Most Popular

To Top