Futbol

Reglanan Internacional pa weganan Final AVB 2016

ORANJESTAD: “Durante e weganan di semi final caba por a nota e direccion nobo cu Arubaanse Voetbal Bond ta bay aden y e ta dunando resultado”, asina Richard Dijkhoff di Arubaanse Voetbal Bond a duna di conoce diadomingo mainta despues di e “Technical Meeting” cu e dos ekiponan hungando den final, esta cu dirigentenan di SV RCA y SV Dakota. Durante e reunion a haya oportunidad pa conta e dos ekiponan di e plannan pa cu e weganan final, kico tur tin prepara y kendenan tur lo t’ey pa presencia e weganan. Por ehempel lo tin ehecutivonan halto di FIFA, KNVB di Hulanda y di CONCACAF na Aruba cu lo ta den stadion pa admira e prome wega final di e campeonato di futbol division di honor di AVB. Tambe lo tin otro invitadonan, manera por ehempel for di Sint Maarten y for di Corsou.

Un di e cambionan cu a palabra cu e ekiponan diadomingo mainta durante e reunion ta cu lo hunga e weganan estrictamente bou di e reglanan internacional di FIFA. Di e forma aki lo mustra mundo henter cu Aruba tambe por hunga su weganan importante den forma grandi. Specialmente pa e weganan aki a apunta Randolf Lacle como “Match Commisioner”. Ta probecha haci uzo di su experencianan, mirando cu e ta conta cu reconocimiento di tanto FIFA como tambe di CONCACAF. Randolf Lacle a ocupa e funcion aki durante varios wega internacional caba. E ultimo wega por ehempel tabata esun entre Mexico y El Salvador den stadion “Azteca” na Mexico City.

A splica ambos team riba e reglanan internacional cu lo mester tene na cuenta. E “Match Commisioner” a repasa e reglanan cu ambos ekipo durante e reunion, pa asina ta sigur cu tur hende ta consciente na kico tur mester tene cuenta cune durante e weganan final. Por menciona cu e reunion tecnico a bay den masha bon ambiente.

Richard Dijkhoff a haci un apelacion riba comunidad pa sigui sostene futbol, manera ta sosodiendo e ultimo simannan. Ta masha importante pa ambos team, tanto SV RCA como SC Dakota por sinti e calor di nan publico cu ta apoya nan. Pa e hungadonan, no tin nada mas grandi cu fanaticada. AVB a percura pa un evento grandi diaranson awor, cu hopi invitado local y internacional, cu animacion y pa hinca tur fanatico den un ambiente sensacional di futbol, alegria y di sosten pa e barionan for di unda ambos team ta bin.

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.

Most Popular

To Top