Baseball

ATCO Indians ta ranca sali cu prome victoria ariba Red Machine 4-1

SANTA CRUZ – Baseball AA a ranca sali ayeranochi den Nadi Croes/Crismo Angela Ballpark cu Campeonato 2016. A duna honor na Coach Gerardo Kock pa saca e prome bala di e prome partido entre ATCO Indians y campeon di anja pasa Red Machine.

Ambos ekipo a sali cu nan mihor pitcher, pa ATCO Indians a sali Angelo Camara mientras cu Richinell Matos tawata e pitcher habridor pa Red Machine. Un duelo di pitcheo unda e score a keda 0-0 te den di 5 inning cu dos out Jason Orman ta anota ariba un wild pitch pa asina ATCO Indians habri score 1-0.

Red Machine no kier a keda atras y ta responde di biaha ora cu Darwin Escobar ta habri inning cu doblete y ta avansa riba error di segunda base Jason Orman. Karel Arends ta roba pa asina Darwin Escobar por bin anota careda di empate.

Den di 6 inning Egimar Lampe ta embasa cu baseba por bola y Bernardo Maduro ta anota Lampe cu un bon bataso pa rightfield an unda e mes ta sali out na tercera pero ATCO Indians ta bai ariba 2-1.

Den di 7 inning ATCO Indians ta anota dos careda mas y asina ta gana e partido 4-1 den e wega inaugural di Baseball AA di ABBA.
Pitcher ganador ta resulta Angelo Camara mientras cu Richinell Matos ta perde.

Nos di Sports Zone Aruba a haci todo por todo pa por a trece e transmission di e partido inaugural envivo atravez di iTV Canal 49. Danki na e cooperacion di ABBA, Baseball Aruba y e team dinamico di Team Films Aruba nos a logra trece pa prome biaha despues di hopi tempo Baseball AA ariba pataya di television y livestreaming ariba Youtube pa tur esnan den exterior.

Sports Zone Aruba asina aki ta annuncia cu iTV Canal 49 lo  presenta tur diabierna e “Friday Night Baseball” atraves di iTV Canal 49 y livestreaming ariba Youtube. Baseball is Back!

Most Popular

To Top