Baseball

ATCO Indians ta derota Freezone Rockets 3-2 den wega di bon picheo

Oranjestad, 13 september 2016 – Dialuna anochi weganan di Baseball AA, organiza pa Amateur Baseball Bond Aruba (ABBA) a reanuda despues di un siman cu weganan no a continua pa motibo di insidente ariba tereno. Sigur un tremendo wega unda cu ekipo di ATCO Indians a enfrenta ekipo di Freezone Rockets.

Freezone Rockets como ekipo di cas a presenta cu Ramon Gonzales como nan pitcher habridor mientras cu ekipo di ATCO Indians tabata tin Jonathan Barry como nan pitcher habridor. E wega aki sigur ambos pitcher habridor a sa di preta braza for di comienzo te na di cinco inning unda cu e wega tabata 0-0. Den cabez di seis inning ekipo di ATCO Indians a logra pone hungador den posicion pa anota y ta logra esaki tambe pa medio di un hit y ta bay ariba cu score di 1-0. Den bom di seis inning, Freezone Rockets no a keda atras y ta bolter e score anotando 2 careda y haci e wega 2-1 na nan favor. E wega a keda asina te ora cu a yega cabez di nuebe inning, ultimo chance pa ekipo di ATCO Indians, kende sigur ta un ekipo cu ta keda lucha te na final y aki ta score 2 careda pa tuma ventaha di 3-2. Ekipo di Freezone Rockets no a score den bom di 9 inning y asina ATCO Indians ta bay cu e victoria cu score di 3-2.

freezone-rockets

ATCO Indians a score 3 careda, a bati 6 hit y a comete 1 error. Pitcher ganador a resulta Angelo Dos Santos Camara. Mihor bateadornan pa ATCO Indians a resulta Jonathan Tromp cu a bay di 1-1 y Jofrani Arends cu a bay di 3-1. Ekipo di Freezone Rockets a score 2 careda, a bati 6 hit y a comete 3 error. Pitcher perdedor a resulta Bryan Courthar. Mihor bateadornan pa Freezone Rockets a resulta Dwayne Kock cu a bay di 2-1, Albertico Noguera y Cedrick Sint Jago cu ambos a bay di 3-1.

Fanaticonan ta keda invita pa asisti na e weganan di baseball AA cu ta di super bon nivel. Nos ta warda boso.

Most Popular

To Top