Futbol

Campeon di futbol di Sint Martin y Aruba ta topa diasabra awor

ORANJESTAD – Diasabra awor dia 17 di september Arubaanse Voetbalbond, AVB, ta organisa e prome “Exchange of the Champions”, unda cu e campeon di Sint Martin, esta Concordia FC, ta enfrenta e campeon di Aruba, esta S.V. RCA den Stadion Guillermo Prospero Trinidad pa 9:00pm. E evento ta cuminsa cu un “clash” entre S.V. Estrella y S.V. Britania pa 7:00pm y lo tin musica di DJ pa entretene publico.

E wega aki ta un regalo, un extra incentivo pa e campeon di Aruba di parti di AVB, segun Presidente di AVB, Richard Dijkhoff a splica y e intencion ta pa organisa un wega internacional pa e campeon di Aruba entre campeonatonan y despues di Copa Don Elias Mansur, cual ta wordo considera un pre-campeonato.

Richard Dijkhoff a splica cu carchinan ta bay den prebenta na Hamaca, Welcome Back Snack y na veld di RCA y ta costa solamente 10 florin pa persona. Muchanan bao di 12 aña ta drenta stadion gratis, pero mester ta compaña pa un adulto. E teamnan di S.V. Estrella y S.V. Britania tambe lo tin ticketnan disponibel.

Benta di e ticketnan ta fungi tambe como un forma extra pa e clubnan yega na fondo, como cu tur benta di entrada cu nan logra ta bay bek pa nan, pa asina nan tin un poco fondo extra net prome cu e campeonato nacional cuminsa.

Juan Valdez, director tecnico di S.V. RCA a splica cu e training di su ekipo a cuminsa ya caba for di dia 19 di juni. Copa Don Elias Mansur tabata un preparacion pa e wega internacional y el a haya un bon chens pa cuminsa cambia e strategianan di e team y introduci pues un sistema nobo compara cu e tecnica nan uza aña pasa. El a agrega cu tin algun hungado nobo y algun cu tabata hungando caba cu e ekipo y cu e tin 4 keeper, 8 defensa, 8 medio campo y 6 delantero ta train hunto y hungando pa e scoge for di nan kende lo forma parti di e ekipo.

Rick Santos ta e di dos capitan di S.V. RCA y ta militando den e ekipo for di un edad hopi jong. E ta hopi entusiasma cu e wega internacional y ta agrega cu S.V. RCA tin un tremendo team y cu no ta por nada cu nan ta e team campeon di Aruba. Tur aña e division “jeugd” ta produci hopi talento y ta yuda hopi den e hoofdklasse, segun Santos. E ta preparando cu hopi confiansa cu RCA lo ofrece un tremendo wega riba dia 17.

Di parti di S.V. RCA atrobe nan lo regala entre nan muchanan 150 ticket gratis, asina Presidente di S.V. RCA, Dito Acosta a laga sa. El a conclui bisando cu nan lo ta organisando tambe un evento na Hamaka dia 16 di september pa haci un poco promocion adicional pa e wega.

Most Popular

To Top