Baseball

Red Machine victorioso contra di Scorpions den baseball AA

ORANJESTAD – Dialuna anochi, 26 september, a tuma lugar un wega candela entre campeonnan di aña pasa Red Machine y ekipo di Scorpions, na tereno di Nadi Croes/Crismo Angela na Santa Cruz. Wega cu for di comienzo a priminti di bira un tremendo wega, sigur no a defrauda fanaticonan cu a presencia e wega aki. Red Machine como ekipo di cas a presenta cu Djurwin Croes como nan pitcher habridor mientras cu ekipo bishitante di Scorpions tabata tin Xavier Blijden como nan pitcher habridor. E wega aki, sigur a cambia ventaha na varios ocasion, unda cu Red Machine ta tuma ventaha, despues Scorpions ta bolter score, pero no ta logra wanta esaki, Red Machine ta empata wega, despues ta tuma ventaha y Scorpions ta bolbe bolter score. Na dos ocasion Scorpions a tuma ventaha di 3 careda y no a sa di wanta e ventaha.

Score final di e wega tabata 10-8 na fabor di Red Machine. Red Machine a score 10 careda, a bati 9 hit y a comete 3 error. Pitcher ganador a resulta Djurwin Croes cu a haya relevo despues di Calvin Maduro. Mihor bateadornan pa Red Machine a resulta Darwin Escobar cu a bay perfecto di 2-2, Filbert Thiel cu a bay di 2-1, Roderick Simon cu a bay di 2-1 cual tabata un homerun, Enrique Tromp cu a bay di 3-2 y Nathan Berkel cu tambe a bay di 3-2. Scorpions a score 8 careda, a bati 6 hit y a comete 2 error.

Pitcher perdedor a resulta Xavier Blijden, cu despues a haya relevo di Dwight Heemstad y Stefan Snijders. Mihor bateadornan pa Scorpions a resulta Christopher Blijden cu a bay di 3-2 y Jonathan Leong cu a bay di 3-1.

Fanaticonan ta keda invita pa asisti na e grandioso weganan aki, cu ta weganan sigur di bon nivel.

Most Popular

To Top