IBISA

IBiSA a gradici miembronan di prensa di un forma hopi special

Durante e encuentro special cu prensa diahuebs ultimo, riba e ‘Dia Mundial di Curason’, IBiSA a gradici tur miembro di prensa pa nan atencion y cooperacion cu nan ta duna na tur evento durante henter aña. E encuentro a inicia cu un conferencia di prensa, unda a hiba palabra primeramente Directora di IBiSA sra. Monique van Embden, sigui pa Minister di Salud y Deporte Dr. Alex Schwengle y a conclui cu e presentacion di sra. Velma Daal, Presidente di Aruba Heart Foundation.

E enfoke a bay riba e ‘Dia Mundial di Curason’ y sra. Van Embden a splica e motibo pakico a scoge precisamente e dia y e tema di salud cu ta hopi importante pa comparti esaki cu prensa. Por lo general ta conoci e estilo di bida hopi ocupa cu miembronan di prensa ta hiba, y cu mayoria biaha no ta sobra nan suficiente tempo pa e cuido di nan mes salud debidamente. Pa un miembro di prensa, e cuido di su propio salud ta keda un reto.

Minister Dr. Alex Schwengle na su turno a mustra riba e importancia di e cuido di nos curason. Como profesional medico el a elabora riba e sistema cardio vascular, splicando cu esaki ta un di e causantenan di mas grandi di e cifra di mortalidad di ultimo tempo. Minister Dr. Schwengle kier a conscientisa tur hende pa cuida nan curason, haciendo suficiente movecion y pa come saludabel.

Aruba Heart Foundation pa medio di su Presidente sra. Velma Daal a papia di e meta cu e fundacion tin, cual ta duna informacion na comunidad con pa preveni di bira un pashent di curason. Sra. Daal a splica cu e fundacion tin su plan di conscientisacion y for di tres aña pasa ‘Aruba Heart Foundation a cuminsa bishita e schoolnan rond di Aruba pa motiva e muchanan pa haci ehercicio y come saludabel. E lema di e ‘Dia Mundial di Curason’ di e aña aki ta: “Power your heart”, cu ta nifica trece mas forsa den bo curason. Sra. Daal a duna ehempel entre otro di core bicicleta, bula cabuya, core y baila. Y el a recomenda pa haci e actividadnan aki den grupo of den famia y asina stimula otro pa keda saludabel.

E parti di ‘Fuel your heart’ ta encera kico nos mester come pa mantene e curason saludabel. E ehempelnan cu a keda duna ta: Pa come un fruta enbes di un mangel; No bebe bebidanan cu hopi sucu; Bebe hopi awa y prepara cuminda na cas mes. E ta den nos propio man pa preveni di haya presion halto y/of bira diabetico. Esakinan ta factornan cu ta malo pa e curason. Nos curason ta e motor di nos curpa, pesey nos mester stima nos curpa y stima nos curason.

Despues di e conferencia di prensa, Directora di IBiSA a invita e miembronan di prensa pa disfruta di e desayuno saludabel prepara pa nan como un ‘treat’ special. Tur miembro di prensa a ricibi un tas di obsekio, pa nan por hiba algo saludabel semper cu nan unda cu nan bay.

Sra. Iraida Thijzen, di Departamento di Salud di IBiSA a haci entrega simbolico di e prome tas na Minister Dr. Alex Schwengle, cu na su turno a entrega esaki na sr. Jason Inesia, como un di e miembronan di prensa presente.

Most Popular

To Top