Beach Tennis

Apertura Weganan Panamericano Beach Tennis 2016

ORANJESTAD – Cu un asistencia masal, di tanto local como hungadornan internacional, ayera nochi a tuma lugar e apertura oficial di e Weganan Panamericano Beach Tennis 2016, organisa pa Beach Tennis Aruba Club (BTA) hunto cu e Federacion Internacional di Tennis (ITF)

Un total di 7 pais cu lo ta participando, USA, Puerto Rico, Venezuela, Brazil, Ecuador, Colombia y Aruba. Riba combinacion di e fotonan por tuma nota di cada un seleccion cu tabata presente. Por remarca si cu basta hungador no a jega Aruba ainda pa e apertura pero por ta sigur cu nan ta presente mainta 10or pa e prome wega por cuminsa, cual ta den categoria di mix doubles.

E seleccionnan di Venezuela y Aruba ta e 2 nan di mas grandi debi cu e 2 pais nan aki ta participa tambe den e categoria di hubenil, caminda Venezuela tin 2 ekipo masculino, 2 femenino y 2 mix. Pa loke ta Aruba nos tin 3 ekipo den cada categoria debi cu nos ta e pais anfitrion.

No ta keda nos nada otro cu invita henter comunidad pa ta presente, entrante diabierna awo, na Beach Tennis Aruba Club na Tropicana pa asina aki apoya tur e participantenan pero principalmente nos ekipo di Aruba. Esaki lo cuminsa diabierna awo, 11 november pa 10or AM. E prome weganan lo ta e mix doubles y pa 5or PM e prome weganan di doubles men & women lo cuminsa. Diasabra 12 november lo continua pa 10or AM cu quarter finals den mix doubles y pa 5or PM lo tin e weganan di semifinal den men y women doubles. E semifinal di mix doubles lo tuma lugar diadomingo 13 november cuminsa pa 10or AM. Tur e weganan aki lo tuma lugar na Beach Tennis Aruba Club situa net banda di Tropicana Hotel. E final mes di cada categoria lo cuminsa diadomingo 5or PM pero e biaha aki nan lo tuma lugar riba Eagle Beach, riba center court, cu ta wordo prepara pa e evento di mas grandi den e mundo di Beach Tennis, cual ta e Aruba Open ITF Tournament, cu lo cuminsa su dialuna siguiente esta, 14 november 2016.

Most Popular

To Top