News

​Garage Cordia ta uni forza cu Fundacion Nos Por

ORANJESTAD – E bringado di mixed martial arts (MMA), Gregory Milliard ta cosechando exito tras di exito internacionalmente y den un esfuerso pa duna bek na su comunidad, el a uni cu amigonan manera Jasmin Trott y Egmond Molina den Fundacion Nos Por pa brinda sosten na hobennan na Aruba.

Garage Cordia ta un di e sponsornan orguyoso cu ta partner di Fundacion Nos Por pa nan prome evento grandi pa hubentud cu ta tuma luga dia 25 di november na Carnival Village. Pa un mainta ta reuni tur e alumnonan di zesde klas di tur scol na San Nicolas pa un evento di motivacion y inspiracion, unda cu diferente orador lo splica di nan bida y carera, lo duna tipnan valioso pa motiva e hobennan pa keda riba bon caminda y pa fortifica confiansa den nan mes, y lanta y sostene nan autoestima.

Milliard ta splica cu a scoge pa invita e hobennan di zesde klas como cu nan ta preparando pa un paso grandi den nan bida, esta e proceso di pasa di basisschool pa un scol secundario unda cu nan ta haya nan mes hopi biaha confronta cu experiencianan y retonan nobo cu tin di haci cu nan curiculo, pero tambe den nan bida social, cu nan circulo di amistad, etc.

Ta un edad y periodo importante pa e hobennan haya un “boost” y ta motiva y inspira pa nan tin mas confiansa den nan mes, y sinti cu nan por logra cosnan grandi den nan bida.

Meta di Fundacion Nos Por ta pa yuda mas mucha keda for di “bida di caya” y pa nan keda riba e bon caminda, Milliard ta agrega.

Pa e mainta di motivacion ta conta cu participacion di entre otro Janiro Eisden, Gregory Milliard, dos hoben di Fundacion Sonrisa y otro contribuyentenan cu mensahenan positivo pa inspira e hobennan pa sigui crece y yuda yega na un miho futuro pa nan mes y pa Aruba.

Disciplina ta clave y esaki ta loke kier enfatisa e mainta aki, segun Egmond Molina, kende ta instructor di fitness y nutricion. E ta encarga cu e parti di weganan y actividadnan pa stimula e parti fisico. Tambe ta inclui algun “mental games” den e programa pa ofrece e pakete completo na e participantenan.

Garage Cordia ta contento cu Fundacion Nos Por a acerca nan pa ta parti di e evento fabuloso aki, pa yuda prepara e hobennan pa un paso hopi grandi den nan bida.

Most Popular

To Top