Baseball

Na memoria di Eddy Banfield, Un Gran Pelotero

​ORANJESTAD – Na 1970 y 1971 Eddy a hunga pa Pepsi Cola den Little League y a hunga cu nos seleccion local na Puerto Rico (1970) y Mexico (1971). Na 1971 el a bay tambe Caracas cu e team di Oso Grape y a wordo considera pa dos scout di Dodgers como un bon prospecto. Na 1973 el a hunga pa e team di White Label cu a bira campeon di A-Klas. Na 1974 y 1975 a hunga den Doble A pa Heineken. For di 1976 pa 1988 a hunga den Doble A pa Budweiser cu na juli 1977 a cambia pa Guiness Rangers y prome cu e playoff semifinal na 1980 a bira Coca Cola Rangers. Durante e periodo aki el a hunga 8 biaha den playoff final y a titula campeon cu Coca Cola na 1980 y 1983. Na 1975 el a bati pa un promedio di 300, 1977 pa 308 y 1978 pa 325. Na 1980 e tawata lider den homerun (hunto cu 2 hungado mas) cu 4. Na 1983 el a pone un record nobo pa nos baseball di 10 homerun conecta y kibra e record bieu cu tawata 6 y tawata den poder di Joe Laveist (Red Sox) na 1941 y Gilly Rombley (Heineken) na 1979. E record aki di 10 homerun a wordo surpasa den siglo 21 ora cu baseball a muda pa e stadion “sandbox” di Duracell.

Na 1974 Eddy a hunga pa e seleccion Antiyano Hubenil den e campeonato Centroamericano y di Caribe y durante su carera a hunga hopi biaha pa nos seleccion Doble A. Na 1978 el a wordo considera pa e entrenador Mericano Hugh Mendez como e miho prospecto cu Aruba tin den baseball. Un otro deporte cu Eddy a practica tawata softball y na 1976 el a bishita Boneiro cu e team di West Berlin.

Na su famia, amigonan y tambe excompañeronan ta bay nos palabra di condolencia y di hopi forza cu e perdida di Eddy. Nos lo keda recorde como un pelotero cu semper a duna tur loke e tin riba tereno y un persona hopi cordial.

Nota

Eddy su historial mester ta hopi mas largo pero den añanan 80 y 90 corantnan no tawata saca tur e estadisticanan final.

Articulo prepara y presenta pa Fransisco Vrolijk. Riba potret di robes pa drechi Sr. Eddy Banfield hunto cu Sr. Endy Croes.

Most Popular

To Top