Baseball

Team Kingdom na Arizona

ARIZONA – Team Kingdom of the Netherlands ta den full preparacion pa locual ta bai bira e evento mundial mas grandi di e deporte di baseball, e World Baseball Classic.

Randolph Oduber, Chadwick Tromp y Ryan Oduber a wordo invita pa e trainingscamp di e seleccion di Reino na Scottsdale, Arizona cual ta e complex di e ekipo di San Fransisco Giants. Manager Hensley Meulens cu cooperacion di su organisacion di San Fransisco Giants a logra pa e ekipo di Reino por train y prepara den un forma optimal.

E seleccion lo conta cu ayudo di 5 hungador di grandes ligas, Xander Bogaerts (Red Sox), Andrelton Simmons (Angels), Didi Gregorius (Yankees), Jonathan Schoop (Orioles) y Jurickson Profar (Rangers). Nan lo raporta dia 1 di Maart segun ta stipula pa MLB. Kenley Jansen cu a caba di firma un contract importante cu e ekipo di Dodgers ta disponibel si encaso nan mester di su persona den e ultimo rond.

E prome rond lo tuma lugar na Sur Korea unda cu Team Kingdom lo bataya contra Sur Korea, Isreal y Chinese Taipei. E seleccion di Reino por ta un di e sorpresa den e torneo aki mirando cu ultimo biaha nan a logra jega te semifinal unda nan a wordo elimina pa Santo Domingo. E biaha aki e grupo tin mucho mas experiencia y esey por ta e differencia.

Team Kingdom lo conta cu un staff di entrenador hopi experiencia. Manager lo ta Hensley “Bam Bam” Meulens cu lo conta cu Andruw Jones como coach, Bert Blyleven como pitching coach, Ben Thijssen y Steve Janssen.

E seleccion di Reino Hulandes lo ta bai tin un tremendo ekipo y lo por ta un sorpresa den e torneo aki. Santo Domingo ta favorito mirando cu nan ta e campeon actual, nan tin un tremendo ekipo. Estados Unidos no a keda atras y pa prome biaha nan tin nan mihor hungadornan hungando. Japon semper ta keda un team fuerte pero no ta descarta cu e ekipo cu ta existi di hungadornan di Aruba, Curacao y Hulanda lo ta den contienda pa e titulo mundial.

Nos di Sports Zone Aruba lo sigui e pasonan di e hobenan di Aruba hopi di aserca ora nan representa nos den e World Baseball Classic cu ta cuminsa dia 6 Maart na Sur Korea. Transmission di e evento lo ta atraves di MLB Network y ESPN Deportes. Bo por sigui nos ariba nos pagina official di social media, Facebook, Instagram y Twitter Sports Zone Aruba pa asina sigui tur e ultimo informacion di e seleccion di Reino Hulandes.

Most Popular

To Top