Baseball

World Baseball Classic Team Kingdom NL

ORANJESTAD – Den oranan di marduga di dialuna a ranca sali e prome wega di e mundial di baseball na Seoul, Korea, e World Baseball Classic 2017.

Aruba tin un rol importante den e mundial aki ora cu nos astro di grandes ligas Xander Bogaerts lo ta hungando tercera base pa e ekipo di Reino Hulandes. Mas aun outfielder Randolph Oduber, catcher Shawn Zarraga y catcher Chadwick Tromp tur ta forma parti di e seleccion.

Shawn Zarraga, Randolph Oduber, Xander Bogaerts, Dwayne Kemp, Chadwick Tromp y coach Wim Martinus

Mientras politiconan ta discuti fuertemente e relacion di cada pais den Reino Hulandes, den e deporte di baseball ta existi un union grandi. E seleccion hulandes no ta consisti solamente di esnan naci na Hulanda sino gran parti di e seleccion lo consisti di e mihor hungadornan di Aruba y Curacao.

E yiu di Curacao Andrelton Simmons shortstop di e ekipo di Los Angeles Angels lo ta e shortstop di seleccion, mientras cu e shortstop di New York Yankees Didi Gregorius lo ta bateador designa. Jurickson Profar profesional cu e ekipo di Texas Rangers lo ta hungando den outfield y segunda base di Baltimore Orioles Jonathan Schoop lo ta na segunda. Mientras cu Wladimir “Coco” Balentien professional na Japon lo ta den outfield.

E resto di seleccion ta hungadornan cu antes tawata professional y ainda ta hungando of ta esnan cu ta na borde di jega Grandes Ligas. Randolph Oduber ta firma cu Lincoln Saltdogs y lo hunga liga independiente na Merca. E hoben Arubiano Shawn Zarraga ta firma actualmente cu e ekipo di Cincinnati Reds y ultimo temporada a hunga den AAA cu e ekipo di Dodgers. Catcher Chadwick Tromp tambe ta firma cu e ekipo di Reds y lo experiencia WBC pa prome biaha cu e seleccion di Reino.

Randolph Oduber durante di World Baseball Classic 2009.

Team Kingdom of the Netherlands ta wordo maneha pa Hensley “Bam Bam” Meulens cu ta actual hitting instructor di San Fransico Giants y lo tin como bench coach e legendario Andruw Jones. Coach na primera lo ta Wim Martinus mientras cu Hall of Famer Bert Blyleven di Hulanda lo ta e pitching coach y Sidney de Jong lo ta e hitting coach.

Andruw Jones ta anota pa elimina Cuba den WBC 2009 na Japon.

Team Kingdom ta den Pool A hunto cu e ekipo di cas Korea, Israel y Chinese Taipei. E prome dos ekipo di e playoff round robin lo avansa pa di dos round cu lo ta na Japon. Pool B na Japon lo consisti di Japon, Australia, Cuba y China. Mientras cu Pool C ta na Miami cu USA, Republica Dominicana, Canada y Colombia. Y por ultimo Pool D lo hunga na Jalisco, Mexico cu teamnan Mexico, Italia, Venezuela y Puerto Rico.

Aruba por ta orguyoso di nos hungadornan cu lo hanja e chens di experiencia e torneo di mas grandi mundialmente di baseball.

Team Kingdom lo ta hungando nan prome wega 5or di marduga contra e ekipo di cas Korea. Compania nacional di telecommunicacion SETAR N.V. a pone e wega disponibel pa tur cliente di cable digital ariba canal 100 of canal 355 HD.

Nos di Sports Zone Aruba y Baseball Aruba ta desea Team Kingdom of the Netherlands tur clase di exito durante e World Baseball Classic 2017!

Most Popular

To Top