Baseball

Brazil Ceres ta knockout ATCO Concrete Indians

ORANJESTAD – Riba tereno di Nadi Croes/Crismo Angela na Santa Cruz, e playoff final di Campeonato Double AA 2016 organisa pa ABBA a ranca sali, cu e prome wega den Pool A, entre e 2 ekiponan di ATCO Indians y Brasil Ceres. E playoff nan lo bai best out of 5 games, cual weganan lo ta tumando lugar na tereno di Nadi Croes / Crismo Angela pero tambe tin algun wega na Joe Laveist Ballpark.
Pa loke ta e prome partido, despues cu ATCO Concrete ta piki 2 careda den e prome inning, Brasil Ceres ta sa di bin bek den habri di 2 inning y ta score 8 careda pa asina aki tuma un ventaha basta amplio. Den bom di 2 ATCO ta purba bin bek, anotando 2 careda pa hasi e diferencia unicamente 5 careda, pero Brasil Ceres no a hasi wega y den di 3, 5 y 6 inning ta bolbe anota 2 careda mas pa asina e wega termina cu un score di 14-3 na fabor di Brasil Ceres.
Un total di 13 coredor a keda na base pa Brasil Ceres mientras cu pa ATCO Concrete esaki tabata 7 coredor. Un total di 13 hit pa Brasil Ceres compara cu 5 pa ATCO Concrete. No tabata tin error pa Brasil Ceres mientras ATCO Concrete a hasi 5 error en total. Picther ganador Tsean Martina, kenda tambe a keda nombra e Player of the Game pa e anochi aki, a sa di domina e bateo di ATCO Concrete. E pitcher cu a bai cu e derota cas tabata Angelo dos Santos.

E weganan playoff pa loke ta Pool A ta como lo siguiente: Dialuna 20 maart, pa 19:45 na Joe Laveist Ballpark, Diahuebs 23 maart, pa 19:45 na Nadi Croes / Crismo Angela Ballpark y si tin mester lo bai 2 extra fecha cual nan ta Diasabra 25 maart, pa 19:45 na Joe Laveist Ballpark y e wega final di e playoff Pool A lo ta Dialuna, 27 maart, pa 19:45 na Nadi Croes / Crismo Angela Ballpark. Atrobe, e ultimo 2 partido nan aki ta unicamente si ta necesario.

Nos kier a invita tur fanaticada di baseball pa jega y apoya nos talentonan local. Tambe nos kier a duna un danki na nos sponsor Tropical Bottling kende a bira nos patronisador pa loke ta e final di Campeonato Double AA – ABBA

Most Popular

To Top