Baseball

ATCO Concrete no a tene piedad di Brasil Ceres

ORANJESTAD – Dialuna ultimo, ATCO Concrete a bin por la goma y a segura pa Red Machine sa, cu nan tei duna bataya sigur sigur den e playoff final di e Campeonato Double AA organisa pa ABBA. Ya for di e prome inning ATCO ta pica dilanti cu 4 careda, ta hasi e bentaha mas grandi den di 3 inning cu anotando 3 careda mas. Den bom di 4 Brasil Ceres ta menasa pero ta logra 1 careda so y cuminsando e di 5, 6 y 7 inning ATCO a disidi di amplia nan bentaha mas pa asina sinti nan mes comodo, anotando un total di 11 careda extra. E score final tabata 18 na fabor di ATCO Concrete y 2 careda pa Brasil Ceres.

Asina mes ATCO a laga 10 coredor na base mientras pa Brasil Ceres esaki tabata 7 coredor. Un total di 15 hit pa ATCO compara cu 8 pa Brasil Ceres. Ambos ekipo a comete 1 error. Pitcher ganador Jason Orman, kenda a pitcha 6 di e 7 inning nan a bai cu e premio di Player of the Game. E pitcher cu a bai cu e derota cas tabata O’neal Tavares

Pa loke ta bateo, pa e ekipo di ATCO Concrete, Joshua Ramada a bai di 3 hit den 5 turno y Johnathan Barry, Jofrani Arends, Bernardo Maduro y Jirvin Penja a bati 2 hit den 4 turno na bate. Pa Brasil Ceres, Mitchell Martis y Shaun Duinkerk a bati 2 hit den 3 turno.

E weganan playoff pa loke ta Pool B ta continua: Diahuebs 23 maart, pa 19:45 na Nadi Croes / Crismo Angela Ballpark y si tin mester lo bai 2 extra fecha cual nan ta Diasabra 25 maart, pa 19:45 na Joe Laveist Ballpark y e wega final di e playoff Pool A lo ta Dialuna, 27 maart, pa 19:45 na Nadi Croes / Crismo Angela Ballpark. Atrobe, e ultimo 2 partido nan aki ta unicamente si ta necesario.

Nos kier a invita tur fanaticada di baseball pa jega y apoya nos talentonan local. Tambe nos kier a duna un danki na nos sponsor Tropical Bottling kende a bira nos patronisador pa loke ta e final di Campeonato Double AA – ABBA

Most Popular

To Top