Uncategorized

Aruba Weightlifting Classic Open Try Out: 4 record nobo!

ORANJESTAD – Diadomingo ultimo dia 19 di Maart a tuma lugar Aruba Amateur Weightlifting Association, su di dos evento pa aña 2017 na Centro Deportivo Frans Figaroa. E evento aki en coneccion cu celebracion di Himno y Bandera a wordo duna den forma di un Classic Open Try Out.

Den Theo Bareño gym yena cu atleta, coaches, famia y conocirnan, a cuminsa cu e Classic Open Try-Out. Un total di 18 atleta di diferente scol di pesas, manera Muscles & Lungs Crossfit, Crossfit A297 y TNT Gym, a participa durante e evento aki.

E evento tawata uno exitoso cu un total di 4 record nobo den damas. Di e 4 record nan aki, 3 di nan a wordo kibra door di Brigitte Valencia cu su total di 112 kg. Brigitte a kibra su record personal pero tambe nacional den categoria 90kg cu su snatch di 45 kg y su clean & jerk di 67 kg. Isabelle Croes a kibra su mesun record den categoria 75kg cu su snatch di 51 kg. Un pabien na e dos damanan aki cu nan tremendo esfuerzo y records nobo!

Durante e evento e juradonan a concentra riba e technica y a duna punto pa cada intento di cada atleta. E top 5 atletanan den e area di technica, den ningun sequencia particular, ta lo siguiente:

• Isabelle Croes

• Jennifer Piter

• Joel Kuiperi

• Jeremy Dijkhoff

• Israel Hernandez

Durante e Try Out a premia e dos mihor lifters den division femenino y masculino. E mihor lifter den division femenino ta Jenifer Piter cu un total di 164 kg. E mihor lifter den division masculino ta Joel Kuiperi cu un total di 290 kg.

 

Un palabra di pabien na tur e atletanan cu a participa y a demonstra nan forza y talento riba e plataforma! Un danki cordial na tur club di Pesas y tambe na nos sponsors, Setar N.V. , High Performance Aruba, Fantastic Gardens, Mac4U, etc. Aruba Amateur Weightlifting Association kier extende un invitacion na tur esnan interesa den e deporte di Pesas pa pasa libremente na un di nos scol di Pesas y tambe por tuma contact cu nos na aawa@arubaweightlifting.com

Keda pendiente pa AAWA su siguiente competencia cu lo tuma lugar 30 di April unda nos talento local lo topa cu e talento di nos isla bisiña, Curaçao. Mas informacion lo sigui!!

Most Popular

To Top