News

REMETIDO: AAF ta aclarea asunto di atleta Vrolijk

ORANJESTAD – Nos di Sports Zone Aruba a ricibi un remetido di e federacion di Atletismo di Aruba y e ta bisa lo siguiente:

Pa acalarea e noticia cu ta cana rond den media tocante e atleta di multi evento Wuill Vrolijk.

Na ningun momento federacion di atletismo AAF a nenga di paga pasashi pa Wuill participa na e Carifta 2017 cu lo tuma lugar na Corsow. Simplemente nos a bin ta introduciendo un systema di cualificacion y basa riba bo
prestacion lo bo tin cu contribui cu un montante chikito.

Añanan anterior 2015 y 2016, nos tabata por a paga tur cos pa e atletanan representa Aruba, pero si tur hende tene cuenta con e economia ta awor aki, nan lo compronde cu nos no por sigi carga e peso ey mas. Danki na Comishon di Subsidio, COA y algun otro instancianan cu nos por cubri gran parti di e budget cu ta basta halto, pa bay un competencia internacional. E standard cu nos a uza e aña aki ta uno cu nos por competi cu atletanan di otro
paisnan.

Di e 12 atletanan cu ta bay representa nos pais, ta 5 a cualifica y lamentablemente Wuill no ta den e 5 nan aki. Si bo cualifica e atleta ta contribui cu afl 180.00 y federacion ta cubri afl 574.00. Si e atleta no a cualifica e ta paga afl
377 y federacion ta paga afl 377.00. Ainda tin mas gastonan cu nos no ta cobra e atletanan. Nos ta bay cu e 7 nan tambe, door cu nos ta pertenece na IAAF y den nan plan di desaroyo nan ta pone como regla cu nos federacion mester stimula mas atleta pa duna lo mihor di nan aunke cu nan no a jega e standard, pero nan ta serca.

Den pasado cu AAF no tabata uza standard, y e dirigentenan di clubnan cu ta conciente cu nan coachnan tin cu prepara nan atletanan bon, tabata sigi desaroyonan di competencianan internacional pa test nos atleta sea na Corsow of den region riba nan propio costo. Federacion di Atletismo no tin intencion di kibra niun atleta, alcontrario nos ta stimulanan pa nan duna nan maximo pa por competi orguyoso y bon prepara contra otro atletanan. Pesey Comishon di Subsidio ta inverti den nos coachnan, pa nan por prepara nos atletanan na un nivel halto.

Un ehempel ta Quincy Breell cu ayudo di Subsidio, Sponsor y fundraising cu e mes a hasi, ta atende un trainingskamp na e momentonan aki den exterior.

Y esey ta e intencion di federacion di Atletismo tambe pa hasi fundraisingnan pa juda nos atletanan ora tin viajenan pa exterior. Nos trabou den e federacion ta voluntario y cu amor pa e deporte di atletismo, pero nos no por sera nos wowo cu dia pa dia e gastonan ta bira mas halto.

Directiva Aruba Athletic Federation

Most Popular

To Top