Baseball

Red Machine ta titula Campeon di Aruba

ORANJESTAD – Despues di hopi anja diasabra ultimo nos a hanja un gran final di baseball AA den un serie cu a jega wega number 7. Un stadion cu un publico grandi a bin presencia e partido entre dos ekipo cu ta rival e ultimo anjanan mirando cuanto final nan a hunga ultimo anjanan.

Red Machine a start sali cu nan mihor pitcher Richinell Matos mientras cu ATCO Indians a manda Jerrold Martijn ariba monticulo. Den di prome inning caba e ekipo di ATCO Indians a pone 3 careda por medio di un bataso di cuater skina di Jourick Blanco cu 2 hende na base. Pero Blanco no tawata cla, den di 3 inning un biaha mas e ta connecta su di dos homerun ATCO Indians den ventaha 5-0.

Pitcher Richinell Matos Powerade MVP Final ABBA

Pa cualkier otro ekipo e score ta pone hopi pression pero e ekipo di Red Machine su batenan a los den gran forma y ta bounce back den di 3 inning cu 3 cared pa asina e wega bira 5-3. Red Machine no ta stop y ta anota 3 careda mas pa asina pone Red Machine ariba 6-5 despues di 5 inning.

ATCO Indians ta anota dos careda bai ariba 7-6 pero Red Machine ta empata e wega cu homerun di Rolando Bido.

Red Machine ta score 4 careda mas pa asina sigura nan victoria di 11-7 ariba e ekipo di ATCO Indians.

Pitcher ganador ta resulta Richinell Matos y Kenny Hart ta sali hungador mas valioso di e partido. Most Valuable Player di e serie final aki ta keda den persona di Richinell Matos cu a sa di gana ATCO Indians 3 wega den 5 dia.

Y asina Red Machine ta titula Campeon di Baseball AA cu nos a compronde ta e di 24 titula campeonil di Aruba.

Un pabien na e fanaticonan di ambos ekipo, na Red Machine cu nan titulo di Campeon y na ATCO Indians cu nan titulo di SubCampeon.

Darwin Escobar y Darl Quandus – Dos ekipo cu ta rival riba veld pero tin lazo di hermandad.

E deporte di baseball a gana cu boso prestacion! Un pabien na e team completo di ABBA por medio di nan president Sherwin Howell cu a sa di pone confiansa den nos di Sports Zone Aruba y Baseball Aruba pa asina trece baseball back pa e fanaticonan di Aruba.

Most Popular

To Top