Baseball

Pelotero Brandon Rincones ta firma cu Boston Red Sox

ORANJESTAD –  Nos a ricibi e grato noticia cu e talentoso hoben pelotero Brandon Rincones ta firma cu e ekipo di Boston Red Sox. Brandon Rincones, pelotero di Stars Organization, semper conoci pa su abilidad den defensa y pa su curason grandi, sin miedo, semper kla pa asumi tur reto cu tur confiansa den su mes. Brandon Rincones pa añas a sa di hunga shortstop y diferente posishonan den infield y tambe pitcher den e selekshonan di Aruba for di edad chikito te na grandi.

Brandon ta sali di un famia di baseball, su Padu y Madu Sr. Eric y Evelina Rincones fundadornan di Aruba Center League, su Opa y Oma Mundo y Haydee Albus, su omo y tanta grandi nan Boy(qepd) y Ina Croes fundador di Aruba North League, su omo grandi nan y leyenda den baseball Arubano Victor Albus y Jozef Albus (qepd). Brandon semper su soño tabata pa hunga baseball profesional. Hopi dedika semper na deporte y semper guia y encurasha door di su mayornan, e conocido Head Coach y President di Stars Organization, Elwin Rincones y Yuneida Rincones-Albus semper a tuma e wega di baseball hopi na serio, y a dedika como famia nan bida den formashon y progreso di su talento.

Awe trabow duro, sacrificio y dedikashon ta habri porta pa un pelotero stima pa tur. Nos di Sport Zone Aruba ta hopi contento cu e logro aki pa Brandon Rincones y kier a desea Brandon tur clase di exito den su futuro carera como beisbolista profesional y nos tin e fe y confiansa cu porta nan lo habri pe pa asina nos por tin un yiu di tera mas den Grandes Ligas.

Nos di Sports Zone Aruba tin entendi cu Brandon lo ta firmando su contract den e dianan venidero na e Jet Blue Park cu ta Boston Red Sox su facility na Fort Myers. Sport Zone Aruba y Baseball Aruba lo tin tur informashon exclusivo pa cu “contract signing” den e dia nan nos dilanti. Masha Pabien Brandon, y awor e trabou ta bai cuminsa! Exito!

Most Popular

To Top