Equestrian

Organisacion Caballista ta anuncia “Interpaso 2017”

ORANJESTAD – Dia 15 pa 17 di September Villa Floralina lo ta un bes mas e sede pa e competencia equino mas grandi di e anja 2017, “Interpaso”. Durante e fechanan aki cientos di bishitante lo presencia tres dia yena cu actividad pa henter famia. Despues di algun anja di ausencia Interpaso lo conta cu cabaynan di Curacao cu lo bin pa participa den e modalidad di Paso Fino.

Cuminsando diabierna 15 di September pa 6’or di atardi, Interpaso lo ranca sali cu competencia di cabay di tur modalidad. Na final lo clausura e prome anochi cu e banda ‘N Fuzion cu lo entretene publico cuminsando 11’or.
Ariba diasabra 16 di September competencia ta cuminsa pa 5 PM. Durante competencia lo tin un show di cabay tambe pa e publico. Despues di e Gran Campeonato, ta sera e anochi cu presentacion di e acordeonista di Colombia, Ma Silena Ovalle.

Ma Silena Ovalle ta un hoben di apenas 22 anja, cu a cuminsa toca acordeon cu un edad di 12 anja. E ta hopi conosi riba rednan social caminda e ta interpreta diferente cancion di Vallenato, Reggeaton, y otro cancion di artistanan famoso. Ma Silena Ovalle ta conosi como “La Princesa del Acordeon” y ta toca na diferente evento na Colombia como tambe otro paisnan den Latino America. Ma Silena Ovalle lo ta acompanja pa Sensacion Vallenata durante su presentacion durante diasabra anochi na Villa Floralina.

Ariba diadomingo ta toca turno na e jinete y amazona local pa bataya contra participantenan di Curacao, Colombia, Venezuela, y Republica Dominicana. Ariba e dia aki tin diferente categoria cu lo ta fuerte, Amazona 12-14 anja y Amazona 15-17 anja como tambe diferente jinete di Curacao lo bin enfrenta e jinetenan di Aruba. E competencia di jinete & amazona lo cuminsa 3’or di atardi. Entrada ariba diabierna y diasabra lo ta solamente 5 florin, y ariba diadomingo esaki lo ta gratis.

Interpaso ta conta cu apoyo di diferente compania; Divi Resorts cu ta ofrece paketenan atractivo pa nos bishitante y hunto cu Tropical Bottling Company, e bar di Interpaso lo ta bon surti cu prijs atractivo cu diferente bucket special y tambe happy hour durante e weekend.

Most Popular

To Top