Triathlon

ACTIVIDADNAN DI ARUBA CHALLENGE ENDURANCE FESTIVAL A INICIA!

ORANJESTAD – Diabierna mainta den ballroom di Hyatt Regency Resort Aruba atletanan profesional, race directors, prensa internacional, local y otro invitadonan y sponsors a duna inicio na e di dos Aruba Challenge Endurance Festival. Centenares di atleta tanto local y internacional for di diferente pais lo participa tanto den e Fitville Caribbean Crossfit Games, 5km Fun Run Walk y culminando cu e atraccion principal e Half Distance Challenge Triathlon. Algun di e paisnan representa den e actividadnan ta USA, Colombia, Venezuela, Hulanda, Brazil, Surinam, Canada, Cuba, Costa Rica, Mexico y naturalmente Aruba. Prensa a haya oportunidad di combersa cu e Pro nan kendenan ta compete na un nivel hopi halto y ta den top condicion pa diadomingo awor. Pa 6.21 am dilanti di Hyatt Regency Hotel a triathlon ta ranca sali y ta premira cu algo menso cu 5 ora e prome atletanan lo yega e finish line. Nan lo cuminsa cu landamento, sigi pa core bicicleta y termina coriendo. Diasabra mainta pa 8 or di mainta un grupo grandi di mucha entre 7 cu 14 aña lo participa den disciplina di landamento y coremento. Esaki lo ta entre Aruba Marriott y Ritz Carlton Hotel. Publico en general ta invita pa bin apoya e muchanan di diferente scol.  Cuminsando mainta te anochi riba e parkinglot di Hyatt Hotel lo tin e Sport Expo cu diferente tienda deportivo y tambe e competencia entre atletanan di crossfit (Fit Ville Caribbean ). Parti atardi pa 6 or lo tin e 5km Fun Walk & Run cu ta sali for di Hyatt y regresa na e mesun sitio. Pa e evento aki ainda por registra diasabra den dia. E prijs ta solamente 20 florin y por gana varios pasashi pa exterior. Tambe pa 6 or e festival di musica y cuminda ta cuminsa. Diasabra lo tin N Fuzion, Joyride, PHATTUNEZ y Dj Vibes. Tambe lo tin 7 restaurant delicioso presente. Tur esaki completamente gratis. Diadomingo mainta lo start cu e Triathlon y atardi lo entrega premio pa 5 or. Despues lo clausura e fin di siman cu e banda di reggae Kawura y e famoso banda Tsunami. Tambe lo tey Music Monks y Dj Version.

Remarcabel pa menciona cu diferente personanan influyente di exterior cu ta presente na Aruba pa cubri e evento riba media y rednan social. Un di nan cu a capta hopi atencion ta yegada di Matteo Carvajal Correa. E ta ganador di e programa popular El Desafio Super Humanos hunto cu Melina Ramirez. Hunto nan tin miyones di ‘followers’ cu lo conoce Aruba di serca.

E pro’s nan cu tabata presente na e conferencia di prensa tabata Jessica Santos, Davide Giardini, Andy Potts, Cody Beals, Brad Williams y Aj Baucco.

E festival ta wordo presenta pa CHALLENGE FAMILY, THE ARUBA TOURISM AUTHORITY, HYATT REGENCY ARUBA y THE ARUBA MARRIOTT RESORT. Otro patronisadornan ta: Tierra del Sol, De Palm Tours, Divi Hotels, Tropicana Hotel, Caribbean Mercantile Bank, Hilton Aruba Resort, De Cuba & Wever, Aruba Wine & Dine, Aruba Aloe, IMC, Ennia, Jet Blue, Cool FM, Compra NV, La Cabana Hotels, Queen Beatrix Airport, Amsterdam Manor, Paseo Herencia, ASD y tur ora cu e a colabora cu e evento.

Most Popular

To Top