Uncategorized

Considera tur cos pero Dodgers tin Kenley Jansen

ORANJESTAD – Tin un cantidad di number di aspectonan individual den baseball moderno cu por dicidi un wega. Awe diamars ta duna inicia na e di 113 edicion di e clasico mundial di baseball, e “World Series” y pa prome biaha despues di 47 anja dos ekipo cu mas di 100 wega gana durante temporada regular lo batalla ariba e escenario mas grandi di baseball na mundo.

Dodgers tawatin mester di solamente 5 wega pa a derota e ekipo di Chicago Cubs durante e National League Championship Series, mientras cu Houston Astros mester a batalla contra di Didi Gregorius y e ekipo di New York Yankees pa 7 wega, ambos ekipo ta basta similar den diferente aspecto. Astros a termina e temporada cu e ekipo cu mas careda anota, mihor “on-base percentage” y “slugging percentage.” Dodgers tawata prome den ERA, permiti base por bola y hit permiti pa inning.

Tin hopi pregunta drentando e World Series aki cu prome cu por duna Astros nan prome titulo di serie mundial den nan historia of e ekipo di Dodgers desde anja 1988.

Pero entre tur e similaridad entre e 101 gana di Astros y 104 gana di Dodgers pa sobrevivi un temporada di 162 wega di Grandes Ligas tin un persona cu por determina e diferencia entre e dos ekiponan aki.

E ventaha ta den nomber di Kenley Jansen

E closer di hermana isla Curacao tin un balor grandi pa e ekipo di Dodgers, vooral den e playoff. Mirando e actuacion di varios hungador cu durante temporada a luci y awor den playoff no por presta mescos, Jansen ta solido den un categoria apart.

Si acaso Astros mester mira Jansen den accion den tur nan wega, nan speransa di jega na un titulo lo jega un fin.

 

Manera e Manager di Dodgers Dave Roberts a pone: “To have him on our side makes life a lot simpler for me.”

Jansen su effecto ariba wega, vooral den playoff ta similar na locual e ekipo di Yankees tawata tin den temporada di gloria di Mariano Rivera. Weganan ta bira cortico. E ekipo contrario cu ta perdi drentando e final di e partido sa cu nan chens pa bolter e wega no ta bira 9 inning sino mas serca di 7 inning.

Mentalidad di un ekipo ta cambia, paso bo no sa ki ora e manager por haci uso di dje, bo lo por ta mas agresivo cu bo kier y specialmente den playoff ora bo sa cu e manager por trece Kenley Jansen pa tira 6 out.

E hecho cu Dodgers a sweep Arizona Diamondbacks y termina Cubs relativamente facil a pone cu manager Roberts no mester a depende ariba Jansen, dunando chens na e resto di bullpen mira accion balioso. Como resultado, Jansen a drenta 7 biaha di cual 2 di nan a bai mas cu 3 out y Jansen no a tira mas cu 18 lanzamiento den cualkier di e salidanan. Tur cos conta, e la tira un total di 8 inning, no a permiti niun careda, solamente 3 base por bola y a poncha un total di 12 bateador.

Pero Jansen por mucho mas, e la demonstra esey durante di e playoff di 2016, ora cu e mester a tira na 5 occasion salido di mas cu un inning. Y durante e temporada regular e anja aki periodicamente Dodgers a pusha Kenley Jansen den e mesun situacion en preparacion pa October.

Mescos Mariano Rivera, Jansen ta depende ariba un lanzamiento cu ta e “cut fastball” pero e anja aki Jansen a concentra ariba su “two seam fastball” y “sliders” den un combinacion pa un mihor temporada regular.

Jansen por perde, na Augustus e la entrega un careda y duna dos tambe den September, tin ora e ta faya di poncha tur hende den e inning tambe, pero tur joke un banda, Jansen ta solido.

E ta bai tuma e pequeno gigante di Venezuela Jose Altuve y e shortstop estelar di Puerto Rico Carlos Correa pa score tempran pa asina por evita di tin chens di gana Jansen laat den e wega.

Most Popular

To Top