Baseball

Baseball Aruba Coaches Clinic 2017

ORANJESTAD – Na anja 2012, Aruba a bolbe hanja importancia den mundo di baseball ora cu Xander Bogaerts tawata cana rapidamente den e organisacion di Boston Red Sox. E prensa Americano a pone luz special ariba e phenomeno di Aruba cu tawata pasando rapidamente den e sistema di liganan menor di Red Sox. Un storia unico unda un hoben di Aruba hunto cu su ruman homber ta firma cu e organisacion di Red Sox pa awe ta e shortstop principal den e ekipo di Grandes Ligas.

E tawata importante pa nos pa e momento special aki no bai asina sin mas, y ta e momento ey mes ta unda Baseball Aruba a bin na existencia. Aruba a keda altanto di tur e pasonan di Xander por medio di e pagina di facebook di Baseball Aruba unda un communidad di e tur e fanaticonan di e deporte di baseball aki na Aruba a cuminsa reuni pa asina keda altanto di noticianan importante di tur e peloteronan di Aruba, unda cu nan por tawata hungando.

Awor cuater anja despues nos ta tuma un stap mas pa asina organisa locual ta bai bira e prome edicion di e Baseball Aruba Coaches Clinic. Cu cooperacion di Sports Zone Aruba, e clinica di baseball lo ta bai ta dianan 18 y 19 di November proximo unda lo tin como invitado y orador principal Sr. Hensley Meulens di hermana isla Curacao.

Sir Hensley “Bam Bam” Meulens ta hitting coach di e ekipo di San Fransisco Giants desde 2010, unda San Fransisco a titula World Series Champions na 3 occasion. Meulens tambe ta e actual Manager di Team Kingdom of the Netherlands unda varios di nos peloteronan di Aruba a hanja chens pa hunga den e torneo mas grandi mundialmente di baseball e “World Baseball Classic.” Nos ta sumamente contento di por tin Hensley Meulens na Aruba pa ta e prome orador durante e Coaches Clinic.

 

Un pelotero cu tawatin influencia grandi ariba Team Kingdom of the Netherlands, un ex-Major Leaguer y actual coach ta Sir Eugene Kingsale mihor conoci como “King” cu tambe lo tey presente pa asina duna su presentacion di coremento di base y specialista di toke di bala. Nos a mira Eugene Kingsale duna un presentacion anja pasa na Curacao durante e Curacao Baseball Week cu a impressiona tur esnan presente y pa es motibo ey nos ta orguyoso di por tin Kingsale durante e Coaches Clinic.

Por ultimo, un di e themanan principal durante e seminario ta keda picheo. Aruba e ultimo anjanan no a desaroya pitcher. Pa es motibo ey nos a aserca un compania na New Jersey cu ta reconoci na Merca pa su preparacion di pitcher na nivel di college y Grandes Ligas. Nos ta bai tin e honor di tin e Director di Biopitch na Aruba Sr. Greg Short pa duna un presentacion na tur e coachnan con nan ta prepara un training pa pitcher.

E fechanan ta poni caba, e Coaches Clinic lo tuma lugar Diasabra 18 di November cuminsando for di 3or di atardi y lo termina pa 8or di anochi. Y diadomingo mainta lo tin un session practico ariba tereno unda lo cuminsa di 9or di mainta y lo termina pa 1or di atardi.

E prijs di entrada pa e dos dianan lo tin un Early Bird special di Afl 35,- pa esnan cu registra ariba nos website y na porta lo ta Afl 50,-, e seminario lo tuma lugar na Paseo Herencia Shopping Mall na Palm Beach den e ballroom di Mr. Jazz. Diadomingo mainta nos lo ta na Nadi Croes/Crismo Angela Ballpark na Santa Cruz.

Baseball Aruba y Sports Zone Aruba kier a gradici nos sponsornan oficial cu ta ATCO Concrete Products, DAMA N.V., EUMAR Lock and Key Services y SUBWAY Aruba cu ta haci e seminario aki posibel.

Registracion ta habri caba y por bishita nos website www.baseballaruba.com pa tur informacion di e seminario. Ticketnan ta obtenibel na Citgo Santa Cruz y Gallo Rojo na San Nicolas. Reseva dibo awor, lugar ta limita!

Most Popular

To Top