Baseball

Baseball Aruba Coaches Clinic ta sigui sin ABBA

ORANJESTAD – Diahuebs anochi den un reunion extraodinario, President di Amateur Baseball Bond Aruba Sr. Sherwin Howell unanimamente a informa e ekiponan di Liga Menor cu ABBA lo no para weganan di fin di siman pa asina nan por asisti na e Baseball Aruba Coaches Clinic asina demonstrando cu e interes di su miembronan no ta central, nos mester aclarea varios punto cu Sr. Howell a trece dilanti.

E idea tras di e Baseball Aruba Coaches Clinic a nace anja pasa December ora nos a tuma e desicion pa bai nos hermana isla Curacao pa asisti e Curacao Baseball Week. Na un manera hopi bon structura nos a participa na e di 5 edicion di e CBW organiza pa Blue Bay Resort. Coachnan ta hanja clinica completamente gratis danki na e cooperacion cu Sir Hensley “Bam Bam” Meulens tin cu e organisacion di International Sports Group (ISG), cual anja pasa a ser representa pa Sr. Jerry Weinstein y Sr. John Vodenlich.

Aldrick Alexander, Didi Gregorius, Jairo Dirksen na CBW 2016

Sr. Jerry Weinstein ta actual Director di Development pa Colorado Rockies y durante e World Baseball Classic tawata manager di e ekipo di Israel. Sr. Weinstein tin un conocemente amplio den e deporte di baseball, e la coach USA Baseball na varios ocasion tawata manager di UCLA Bruins pa hopi anja, un berdadero encyclopedia di baseball.

Den combersacion cu Sr. Jerry Weinstein nos a splike cu nos lo ta interesa si un dia e lo por bin Aruba y duna e mesun clinica aki y a duna di conoce cu tur cos ta pasa via Sr. Peter Caliendo di ISG pero e lo ta contento di bin Aruba.

Tambe nos a hiba combersacion amplio cu Sir Hensley Meulens cu a bisa nos cu si nos por organisa algo rond di e mesun fecha di e CBW, e lo zorg pa bin duna un charla na Coachnan di Aruba y asina nos a acorda tambe.

Na April, nos a duna un empuhe na e deporte di baseball na Aruba unda cu nos a mercadea y televisa partidonan di playoff final di AA, cual a resulta un exito rotundo. Personalmente es tempo ey nos a avisa President Sr. Sherwin Howell di nos plan pa trece Sr. Jerry Weinstein pais Aruba, cual no tawata niun problema.

Mas e dianan ta jegando nos a bolbe avisa personalmente Sr. Howell cu nos kier bin cu e Coaches Clinic, e momento ey Sr. Howell a indica na nos cu nan mes lo organisa un coaches clinic.

Mientrastanto Sr. Hensley Meulens tawata enthusiasma pa bin Aruba y nos no por a laga e oportunidad bai, e fechanan a bira November 18-19 net prome cu Thanksgiving y e Curacao Baseball Week. Nos a hanja Kainoa Correa danki na un recomendacion personal y Kai a accepta nos invitacion de immediato aunke cu lo e tin cu viaha back pa join su famia pa Thanksgiving.

Sr. Greg Short no tawata riba nos lista di invitado pero ora e la tende cu nos lo tawata bai tin e clinica na Aruba, e la bisa nos cumpra su ticket y e ta bin sin falta for di New York. Sr. Greg Short dos anja pasa a wordo contrata pa e Minister di Deporte na St. Domingo pa duna clinica y nos ta sumamente contento cu e ta bin Aruba.

E proceso pa inicia y trece un clinica Aruba no ta facil, e personanan aki ta profesional den nan trabou y ta dedica henter anja na e deporte di baseball, Meulens a caba di entrevista cu New York Yankees y su compromiso cu nos tawata fuerte.

Sin e sponsernan ATCO Concrete Products cu ta kere firmemente den e deporte di baseball algo asina nunca lo no ta posibel, na Paseo Herencia Shopping Mall cu a coopera den tremendo forma pa usa e ballroom, na DAMA N.V., na EUMAR Lock and Key Services, na SUBWAY cu e anja aki a duna Aruba Little League un sosten grandi pa cu nan campeonato, na Tropical Bottling Company y su productonan Coca-Cola y POWERADE cu a apoya ABBA durante nan playoff final, Benjamin Security Services cu semper a apoya baseball y finalmente na Lotto pa Deporte cu na ultimo momento nos a convence y ta kere firmemente den e proyecto di Baseball Aruba y Sports Zone Aruba, un mil di danki.

Finalmente, nos ta conta cu sosten di e organisacion di baseball na Aruba, nos a wordo pidi pa coopera cu ABBA, nos a purba, nos no a logra. Nan mes a dicidi di pidi ABBA pa unda cu tawata por cambia e schedule, pone weganan den siman tampoco ABBA no kier a coopera, demonstrando cu nan no ta mira e importancia pa nos coach y managernan e oportunidad di hanja mas conocimento di e deporte di baseball.

Nos lo sigui sin ABBA su sosten, nos lo sigui na traha na bienestar di nos baseball, di e muchanan te na e seleccionan di AA. Nos ta habri semper pa tur preocupacion y nos ta purba na jega na un balanse cu tur partido. E momento aki ta unico, e no tawata facil.

Diasabra nos ta na Paseo Herencia Mall, den e ex. Mr. Jazz Ballroom, nos invitadonan ta jega majan, Sir Hensley “Bam Bam” Meulens di hermana isla Curacao, Director/CEO di BioPitch Sr. Greg Short for di New Jersey, Coach di University of Northern Colorado Sr. Kainoa Correo di Colorado y finalmente nos astro di Aruba Sir Eugene Kingsale.

Un Saludo Deportivo,

Aldrick Alexander y Jairo Dirksen

Most Popular

To Top