Taekwondo

Seleccion di Taekwondo a sali pa Colombia

ORANJESTAD – Diasabra mainta e seleccion den e deporte di taekwondo bou liderazgo di coach Teo Rodriguez a sali pa Colombia. E seleccion lo atende un campo di entrenamento pa un siman na Sagomoso.

Despues lo sigui cu e campeonato ranking nacional di Taekwondo di Colombia unda mas cu 1000 competidor di henter Colombia lo participa. Segun coach Teo Rodriquez; “Nos a haya e oportunidad cu e seleccion di taekwondo pa atende un campo di entrenamento y alabes participa na e campeonato nacional di taekwondo di Colombia cu 6 atleta di nos seleccion.
Nos atletanan ta preparando pa diferente competencia e proximo anja manera e US Open na Januari como tambe ta buscando un of mas clasificacion den otro torneonan grandi. Un atleta lo busca su clasificacion Olimpico mientras Monica Pimentel lo trata na clasifica pa e Weganan CAC di Barranquilla, Colombia. Nos a haya e oportunidad di entrena y prepara nos atletanan cu e seleccion Colombiano cual sigur ta un oportunidad unico. E nivel di e taekwondo di Colombia ta uno mundial y di nivel super halto. Pa nos atletanan esaki ta un oportunidad unico mirando cu nan lo haya por lo menos 15 combate pa bringa y e lo entrena por lo menos 2 a 3 ora y dos bez pa dia.

E obhetivo cu a logra cu e atleta Chiara Petrocchi na Chile su inicio tabata na e campo di entrenamento na Colombia, pues e oportunidad aki nos no por perde”. E seleccion nacional di taekwondo ta consisti di e atletanan Jourde Klaber, Charrick Winterdaal,
Chiara Petrocchi, Hakeem Lowe y e atleta Olimpico Monica Pimentel. Presente na e despedida
di e seleccion nacional di taekwondo, director di St. Fundacion Lotto pa Deporte, Sr. Di Stefano Wernet y presidente di Aruba Taekwondo Bond, sr. Guaicaipuro Jimenez. Un danki sigur na Lotto, e Loteria di Aruba pa medio di St. Sportsubsidie Aruba cu a subsidia e biahe y estadia di e seleccion di taekwondo na Colombia. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.

Most Popular

To Top