Baseball

Diaz y Kemp suspendi 4 aña di baseball Hulandes

ORANJESTAD – E hoben pelotero di Aruba Christian Diaz y Urving Kemp cu ta forma parti di e ekipo di Curacao Neptunes den Hoofdklasse di Hulanda a ricibi e noticia cu nan lo haña 4 aña di straf pa a test positivo na substancianan prohibi.

Christian Diaz na dos occasion a sa di gana e titulo di mihor bateador di e liga Hulandes y tawata un di e mihor hungadornan di Hoofdklasse na Hulanda unda a sa di gana varios titulo cu e ekipo di Rotterdam, Curacao Neptunes.

Diaz a conta nos di Sports Zone Aruba cu e mes a keda sorprendi di e test positivo di doping mirando cu desde e ta hunga den e Hoofdklasse di baseball na Hulanda e ta haci random test tur aña.

Aña pasa July ora e test a sali positivo ambos Diaz y Kemp a wordo geschorst pendiente e investigacion.

KNBSB cual ta e moederbond di e deporte di baseball a pasa e investigacion y desicion den man di “Instituut Sport Rechtspraak” cual a jega na e desicion final di un straf hopi pisa di 4 aña.

E president di e ekipo di Neptunes Sr. Geoffrey Kohl a duna di conoce cu e no tin problema cu e test, regla ta regla y mester cumpli cu regla. Locual si e no ta di acuerdo cune ta cu e duracion largo di e straf. Den ningun otro deporte y vooral na e nivel amateur no ta duna un straf asina halto.

Mientras cu Kemp si a tuma su straf, Diaz a dicidi di bringa e desicion y lo e bai den beroep cu e desicion. Diaz a duna e investigadornan tur e supplementonan cu e ta tuma demonstrando asina transpariencia y un confiansa cu e no a tuma nada prohibi pa e deporte di baseball.

Di otro banda e la indica cu e tin un yiu chiquito y cu si e straf di 4 aña keda lo e bisa ayo na e deporte di baseball como hungador activo. Y lo dedica tempo na su yiu.

Mas y mas, na nivel di tur deporte ta haci test pa droga y substancianan prohibi. Na Aruba tambe tin papia cu lo bai introduci testnan di doping y e consequencia por ta pa e deportista.

Most Popular

To Top