Baseball

Apertura Aruba Little League diabierna awor

ORANJESTAD – Un otro temporada di baseball Little League lo inicia pa nos hoben peloteronan na Aruba ora cu diabierna awor, Aruba Little League inaugura den forma oficial nan temporada di baseball infantil/hubenil riba nos isla cu e Ceremonia di Apertura den stadion di Nadi Croes/Crismo Angela na Sta Cruz.

Baseball sin duda ta un di e deportenan mas praktica riba nos dushi isla y cada bez ta mira un crecimiento den esaki. Un factor cu sin duda a yuda na engrandese e deporte ta e campnan di baseball ofreci pa tur cu kier yuda mira e deporte bay padilanti. Anja pasa tanto e peloteronan profesional firma den exterior como tambe algun instancia priva y e federacion madre ABBA a organisa campnan di baseball pa nos muchanan. Es mas hasta por a mira un baseball camp pa e ser femenino cu porcierto a haya un acohida masha grandi mes di mucha muhernan hoben cu kier sinja e deporte aki. Tur dia nos por mira e terenonan di baseball yena cu mucha y hobennan cu ta entrena nan deporte preferi. E exito di e ultimo añanan den Little League unda Aruba su hoben peloteronan ta saca cara internacionalmente ta haci cu e interes losigui crece.

E anja aki den luna di Juli, Aruba Little League a logra cu e campeonato Latino Americano di junior league lo wordo teni riba nos dushi isla. Ainda ta fresco den nos memoria ora na anja 2010, Aruba a logra e titulo mundial den Senior League na Bangor, Maine, Merca. Mas cu claro nos lo un dia kier yega eynan atrobe, pero nos mester bay traha extra duro pa logra e meta ta anhela. Un danki sigur na Lotto, e Loteria di Aruba pa medio di Stichting Sportsubsidie Aruba ta yuda subsidia e campeonato di baseball organisa pa Aruba Little League. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba

Most Popular

To Top