Baseball

Grandioso Apertura di Aruba Little League 2018

ORANJESTAD – E deporte di baseball ta goza di un acogida grandi e ultimo anjanan mirando cuanto hungador professional Aruba tin den diferente organisacion di MLB. Y e temporada di Little League ta e organisacion cu ta carga e deporte di baseball infantil na Aruba. Den un stadion Nadi Croes/Crismo Angela na Santa Cruz yena completamente cu mucha y mayor cu a bin pa e gran apertura di e campeonato 2018. Tur 3 liga di Aruba a uni pa asina duna inicio di e temporada cu un bunita desfile di tur ekipo. Di softball di damas te na e hobenan di Senior league a duna presencia.

E campeonato e anja aki a ser dedica na Sr. Braulio Wester, un baluarte den e deporte di baseball Little League pa su dedicacion voluntario na e deporte cu anja pasa a bai laga nos. President di Aruba Center League Sr. Cai Cai Williams a anuncia cu e liga central lo ricibi e nomber official di awor en adelante Liga Central Braulio Wester asina dunando honor na un persona cu a contribui grandemente na Aruba Center Little League y a dedica su bida na e deporte di baseball Little League na Aruba.

Minister di Deporte Sr. Dangui Oduber a haci entrega di e reconocimento na e yiu homber Sr. Adry Wester cu a ricibi e honor na nomber di famia Wester. Di es forma aki Minister di Deporte a duna inicio na e campeonato nobo cu e sake di prome bala unda e catcher Sr. Distefano Wernet actual presidente di Lotto Aruba y Sr. Adry Wester a fungi como e bateador.

Nos di Sports Zone Aruba y Baseball Aruba kier a desea tur organisacion tur clase di exito pa e temporada nobo.

 

Most Popular

To Top