Running

Disney Princess Half Marathon 2018

ORANJESTAD – E fin di siman aki ta tuma lugar na Orlando, Florida e di 10 Anniversario di e “Glass Slipper Challenge.” E ta consisti di un 10K ariba diasabra y un Half Marathon ariba diadomingo. Aruba tambe lo ta presente cu e ekipo di Running Princesses of Aruba, e coredornan Brigit Dijkhoff, Carolina Merryweather-Raven, Nizana Solognier, Farah Figaroa, Shohaira Da Silva y Tracey Nicolaas lo competi den e challenge aki.

E princess nan aki tur ta bai core pa un causa, nan lo ta coriendo pa e American Association for Cancer Research cu ta haci estudionan valioso pa jega na compronde e malesa di cancer mientras cu Farah lo ta coriendo pa e unico mucha na Aruba cu tin Epidermolysis Bullosa (EB) cu ta jama Ethan. Farah tin un connecion personal cu e malesa di EB, Farah ta tanta di Brian cu tambe a nace cu EB. Na 2012 Farah a cuminsa core half marathon pa asina a yuda su ruman homber pa recauda fondo y concientisa e communidad di e malesa EB. Lastimamente na 2014 cu su 8 aña Brian a bira un angelito den cielo.

Ethan tin 2 anja y ta gusta hunga. Mira Ethan core riba brommer.

Ethan tin un malesa cu ta hopi peculiar, e essencia di e malesa EB ta cu e cuero di Ethan ta super fragil y cu cualkier golpi Ethan ta hanja blaar cu ta bira herida cu ta dificil pa cura. Ethan tin varios herida na su pianan y pa es motibo Ethan ta wordo protehi pa no hanja mas blaar cual ta un guerra di tur dia.

Pa esnan cu lo kier contribui cu Farah su causa di yuda Ethan lo por click aki. Farah ainda no a jega su meta y lo keda sumamente contento na esnan cu ainda lo por contribui na su causa.

https://www.youcaring.com/ethan-971199?utm_campaign=buttonshare&utm_medium=url&utm_source=copy&utm_content=cf_cp_01

E Running Princesses of Aruba kier a gradici tur esnan cu a apoyanan y ta spera cu nan lo sirbi como estimulo pa nos communidad.

Nos di Sports Zone Aruba ta deseanan tur clase di exito cu nan careda na Disney na Orlando, all the best!

Most Popular

To Top