Futbol

Copa John Merryweather ta cai riba dia di Rey

ORANJESTAD – Manera ya a bira un tradishon, diabierna awor 27 di April, sport vereniging Racing Club Aruba lo bolbe dedica un torneo infantil na un di su miembronan di honor Sr. John Merryweather. “Opa John” manera e muchanan ta jame ta pasa tur dia di su siman ta bishita club pa asina disfruta y motiva nos hobencitonan. Na caminda pa celebra 85 aniversario, e torneo aki lo bira uno unda 85 mucha di e cantera tricolor, cu edad di 4 te 11 aña lo bataya contra otro den formato 5 contra 5. Pa 9or di mainta lo ranka sali den “Cuna di Talento Eric Gomez” cu categoria U-5 y asina lo continua cu U-7, U-9 y termima cu U-11 rond 5or di atardi. Den e torneo cada ekipo lo representa diferente paisnan den Mundial 2018, manera Colombia, Peru, Argentina, Brazil, Inglatera, Spanja, Portugal, Alemania. Banda di e torneo aki tambe lo tin competencia “free-style” den e popular “Pana Cage Joy Rosa” y bou guia di “El Maestro Himself”. Manera semper prijsnan di bar ta prijs di famia y menu di cushina lo ta soculento cu variashon di snacks y criollo. Ambiente ta na encargo di e talentoso DJ MCK cu e poder di High Performance. Un danki ta bai na Fruteria Virgilio y e comishon organisatorio cu ta forma pa leidsters y coaches. Diabierna awor lo tin tambe jerseey di RCA na benta durante evento.

Nota: RCA “BIG WHEEL LOTTERY powered by POWERADE” a derota Riverplate 4-0 diadomingo ultimo y awor lo bai topa Dakota den e Gran Clasico di tur Clasicos. E wega aki a ser re-schedule y lo ta diasabra 5 di mei pa 8:30 pm. Ban sigi apoya nos Soldatnan Tricolor cu e mesun animo y positivismo, semper cu respet pa Refrees y contricante. #RCApaBida

Most Popular

To Top