Baseball

Stadion Nadi Croes/Crismo Angela den mal estado

ORANJESTAD – Na July proximo Aruba lo ta anfitrion di e Campeonato Latinoamericano di Baseball Junior League 13-14 anja. Aruba lo conta cu un total di 9 ekipo cu lo bin di exterior pa asina competi na pais Aruba enbusca di un pase pa e World Series cu lo tuma lugar na Taylor, Michigan.

E parke di baseball Nadi Croes / Crismo Angela lo ta e stadion definitivo pa e torneo di taya grandi aki. Na anja 2013 e stadion tawata e escenario ultimo biaha pa e torneo grandi aki, es tempo ey e tawata apenas 3 anja despues di su inauguracion.

Nos a bishita e stadion ultimo y e ta den un estado no apto pa un torneo di e magnitud di e campeonato Latinoamericano.

Recientemente a laga drecha e dak, cual a keda masha bunita pero e dak nobo a keda sin iluminacion. E luznan cu ta ilumina e tribuna a ser kita y no a wordo poni back, mas aun e dak su disenjo a keda como hogar pa paloma cu a invadi e dak y te ainda ta un molester grandi pa e publico cu ta asisti na wega.

Otro problema cu a ser constata ta e camerin ambos banda di e stadion unda cu e vloer a kibra por completo. Tambe ya ta mas cu 2 anja cu a priminti cu lo pone e “water cooler” back den ambos camerin, esey no a tuma lugar mas. Organisadornan tur weekend tin cu cumpra ijs pa asina pone jug den dugout siendo cu e facilidad tawata conta cu su propio “water cooler.”

Cu masha fanfaria Lotto pa Deporte recientemente a inaugura officialmente e “batting cage” na Nadi Croes / Crismo Angela pero despues di e prome wega a pone un borchi cu ta bisa cu no por haci uso te proximo aviso. Locual nos a bin compronde cu no por a llega na un areglo con dos team por warmup prome cu wega den e “batting cage” y asina niun ekipo no por haci uso di e batting cage cual den nos opinion no tawata e cage mas adecuado pa un stadion di baseball, e pregunta ta keda cuanto a gasta na e “batting cage” y dikon no por a pone dos enbez di un so.

Por ultimo, weganan di anochi ta rekiri iluminacion adecuado pa por hunga baseball na nivel internacional, e luznan actual no ta na standard internacional y ta conta cu diferente caminda den e tereno di wega cu ta practicamente den escuridad.

Aruba lo bai inverti hopi placa den e torneo di baseball Latinoamericano, pero e stadion na Santa Cruz mester di su mantencion urgente. Ta urgi tur instancia concerni, di Lotto pa Deporte, Gobierno di Aruba por medio di e departmanto di e Ministerio di Deporte pa pone atencion na e puntonan concerni y drecha e situacion actual.

Nos peloteronan ta preparando di basta lunas caba en preparacion pa e evento grandi den e deporte di baseball e anja aki ariba nos isla, y e ta importante pa nos bishitantenan goza den un lugar apto pa un torneo di e magnitud grandi di un Latinoamericano.

 

Most Popular

To Top